ភ្នំពេញ៖ ក្រោយកងទ័ពកម្ពុជា-ថៃ ឈប់បាញ់ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានជំរុញឱ្យរួមគ្នាការពារសន្តិភាព ដើម្បីជៀសវាងបាត់សន្តិភាពទើបស្វែងរកសន្តិភាព ដែលជារឿងដ៏លំបាក។ នេះបើតាមការចុះផ្សាយរបស់សម្តេចតេជោ ហ៊ុន សែន នារសៀលថ្ងៃទី២៩ ខែកក្កដា ឆ្នាំ២០២៥។

សម្តេចតេជោ មានប្រសាសន៍ថា៖ « ទោះមានការឈប់បាញ់តែខ្ញុំមិនបានសម្រាកច្រើនទេ យប់មិញខ្ញុំសម្រាកបានជាង ២ម៉ោង និងបានបន្តការងារហូតដល់ពេលនេះ នឹងអាចបន្តរហូតម៉ោង៧ល្ងាច ឬលើសពីនេះទៅតាមការវិវត្តនៃសភាពការណ៍»។

សម្តេចតេជោ ហ៊ុន សែន បានបន្តទៀតថា៖ « កិច្ចការរបស់ខ្ញុំចាប់ពីម៉ោង ១២យប់ថ្ងៃ២៨ ឆ្លងចូលថ្ងៃ២៩ ខែកក្កដា ឆ្នាំ២០២៥នេះ គឺជួយជ្រោមជ្រែងអនុវត្តនូវកិច្ចព្រមព្រៀងឈប់បាញ់ឱ្យទទួលបានជោគជ័យ ដើម្បីធានាថា សង្គ្រាមនឹងត្រូវបិទបញ្ចប់ជំនួសដោយសន្តិភាព»។ សម្តេចតេជោ បានអរគុណកងទ័ពនៃប្រទេសទាំងពីរកម្ពុជា-ថៃ ដែលបានគោរពនិងអនុវត្តនូវកិច្ចព្រមព្រៀងឈប់បាញ់នេះ នឹងបង្កើតឱ្យមានការប្រជុំថ្នាក់ភូមិភាគប្រកបដោយជោគជ័យ៕