ភ្នំពេញ៖ ឯកឧត្តម អ៊ីវ៉ាយ៉ា តាកេស៊ី រដ្ឋមន្ត្រីការបរទេសជប៉ុន អំពាវនាវឱ្យប្រទេសកម្ពុជា និងថៃ អនុវត្តការអត់ធ្មត់ជាអតិបរមា និងសង្ឃឹមថា ភាពតានតឹងរវាងប្រទេសទាំងពីរ នឹងត្រូវបានបន្ធូរបន្ថយ ដោយសន្តិវិធីតាមរយៈការសន្ទនា។

ក្នុងកិច្ចសន្ទនាតាមទូរសព្ទជាមួយ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃប្រទេសកម្ពុជា នាថ្ងៃទី២៥ ខែកក្កដា វេលាម៉ោង ២:២០នាទីរសៀល（ម៉ោងនៅប្រទេសជប៉ុន) ប្រមាណជា ២៥នាទី ឯកឧត្តម អ៊ីវ៉ាយ៉ា តាកេស៊ី បង្ហាញកង្វល់យ៉ាងខ្លាំងរបស់ ប្រទេសជប៉ុន ចំពោះការប៉ះទង្គិចរវាងយោធា នៃប្រទេសកម្ពុជា និងថៃ ដែលកំពុងកើតឡើង។

នាឱកាសនោះ ឯកឧត្តមឧបនាយករដ្ឋមន្ត្រី ប្រាក់ សុខុន ក៏បានពន្យល់ពីគោលជំហររបស់កម្ពុជា និងបង្ហាញពីបំណងក្នុងការដោះស្រាយស្ថានការណ៍ឱ្យវិលទៅរកភាពប្រក្រតីឡើងវិញឱ្យបានឆាប់៕