ភ្នំពេញ៖ ក្រសួងព័ត៌មាន និងនិយ័តករមូលបត្រកម្ពុជា (ន.ម.ក.) ចុះអនុស្សរណៈនៃការយោគយល់ (MoU) ស្តីពី កិច្ចសហប្រតិបត្តិការផ្សព្វផ្សាយព័ត៌មាន និងព្រឹត្តិការណ៍ នៅលើប្រព័ន្ធផ្សព្វផ្សាយរបស់ក្រសួងព័ត៌មាន ពិសេសខ្លឹមសារ និងអត្ថបទព័ត៌មានពាក់ព័ន្ធនឹងការវិនិយោគក្នុងវិស័យមូលបត្រ នៅកម្ពុជា។

MoU ដែលចុះហត្ថលេខាដោយ ឯកឧត្តម ស៊ូ សុជាតិ ប្រតិភូ រាជរដ្ឋាភិបាលទទួលបន្ទុកជាអគ្គនាយក នៃ ន.ម.ក. និង ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នៅទីស្តីការក្រសួងព័ត៌មាននេះ នឹងចូលរួមជំរុញការអភិវឌ្ឍទីផ្សារមូលបត្រ តាមរយៈការលើកកម្ពស់ការយល់ដឹង, ការសហការផលិតនូវមាតិកានានារបស់ ន.ម.ក. ឱ្យកាន់តែច្រើនសម្បូរបែប ដោយស្របតាមសម័យកាលនៃព័ត៌មានឌីជីថល។

លើសពីនេះ ភាគីទាំងពីរ ក៏នឹងសហការផ្សព្វផ្សាយបន្តឱ្យបានកាន់តែទូលំទូលាយនូវព្រឹត្តិការណ៍ ដំណឹង កម្មវិធី និងព័ត៌មាន ទាំងអត្ថបទ រូបថត រូបភាព វីដេអូរបស់ ន.ម.ក. នៅលើប្រព័ន្ធផ្សព្វផ្សាយទាំងអស់ របស់ក្រសួងព័ត៌មាន ដោយស្របតាមទិសស្លោក ថ្មី ពិត លឿន និងទូលំទូលាយប្រកបដោយជំនឿទុកចិត្ត និង វិជ្ជាជីវៈ ដើម្បីផ្សារភ្ជាប់គ្រប់មជ្ឈដ្ឋាន។ នេះបើតាមការចុះផ្សាយរបស់ ន.ម.ក. កាលពីថ្ងៃទី១១ ខែកក្កដា ឆ្នាំ២០២៥៕