ភ្នំពេញ៖ ឯកឧត្តម ហុង ណារិត និងលោកជំទាវ លី សាគីណា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ចុះទៅទីតាំងដាំបន្លែ នៅក្រុងសិរីសោភ័ណ្ឌ និងក្រុមផលិតបន្លែអូរសឿ នៅភូមិអូរសឿ ឃុំសឿ ស្រុកមង្គលបុរី ខេត្តបន្ទាយមានជ័យ ដើម្បីពិនិត្យវឌ្ឍនភាព និងសមត្ថភាពផ្គត់ផ្គង់បន្លែ ដែលជាផ្នែកមួយនៃការគាំទ្រខ្សែច្រវាក់ផ្គត់ផ្គង់ស្បៀងជូនកងទ័ព ដែលកំពុងបំពេញភារកិច្ចការពារទឹកដី តាមបណ្តោយព្រំដែនកម្ពុជា-ថៃ។

ការចុះពិនិត្យ និងសំណេះសំណាល ជាមួយកសិករ នៃក្រុមផលិតបន្លែ ខេត្តបន្ទាយមានជ័យ នេះ ឯកឧត្តមអនុរដ្ឋលេខាធិការ និងលោកជំទាវអនុរដ្ឋលេខាធិការ បញ្ជាក់ថា គឺដើម្បីស្វែងយល់ពីចំណុចខ្លាំង បញ្ហាប្រឈម និងពិនិត្យលទ្ធភាពរកដំណោះស្រាយជូនកសិករ ដើម្បីរួមចំណែកបង្កើនប្រសិទ្ធភាពខ្សែច្រវាក់ផលិតកម្មបន្លែ ក្នុងគោលដៅបន្តធានាសន្តិសុខស្បៀង និងការផ្គត់ផ្គង់អាហារដែលមានគុណភាព។

គួរបញ្ជាក់ថា ការចុះពិនិត្យវឌ្ឍនភាព និងសមត្ថភាពផ្គត់ផ្គង់បន្លែនៅបន្ទាយមានជ័យ កាលពីថ្ងៃទី១៣ ខែកក្កដា ឆ្នាំ២០២៥ នេះ ក៏មានការចូលរួមពីលោកប្រធាន អនុប្រធាន និងមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ រួមជាមួយក្រុមយុវជន សសយក និងសិស្សវិទ្យាល័យហ៊ុនសែនខ្លាកូនផងដែរ៕