ភ្នំពេញ៖ សហគ្រាសចំនួន៨ ដែលមានមូលដ្ឋាននៅទីក្រុងអូសាកា ប្រទេសជប៉ុន មានគោលបំណងសិក្សាស្វែងយល់អំពីមុខសញ្ញាវិនិយោគ ពិនិត្យលទ្ធភាពបណ្តាក់ទុន និងពង្រីកការវិនិយោគបន្ថែមនៅកម្ពុជា។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៨ ខែកក្កដា ឆ្នាំ២០២៥។

សហគ្រាសជប៉ុនចំនួន៨ នោះ មានដូចជា Next Make ដែលមានឯកទេសផ្នែកអភិវឌ្ឍន៍កម្មវិធី, ReloExcel, Inc. ឯកទេសផ្នែកអភិវឌ្ឍន៍ធនធានមនុស្ស, ACS Co., Ltd. ឯកទេសផ្នែកបច្ចេកវិទ្យាឌីជីថល, Japan Farm Products ឯកទេសផ្នែកកសិ-ចំណីអាហារ, MK Corporation ឯកទេសផ្នែកភស្តុភារកម្ម, Ring Co., Ltd. ឯកទេសផ្នែកកម្មន្តសាលគ្រឿងបង្គុំអេឡិចត្រូនិក, Mitsuyoshi Cambodia Co., Ltd. ឯកទេសផ្នែកកម្មន្តសាលគ្រឿងសង្ហារិម និង Alaki Co., Ltd. ឯកទេសផ្នែកបច្ចេកវិទ្យាឌីជីថល។

ក្នុងបេសកកម្មគោះទ្វារសហគ្រាសនៅទីក្រុងអូសាកានេះ ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានលើកឡើងអំពីបច្ចុប្បន្នភាពថ្មី នៃបរិយាកាសវិនិយោគ ក៏ដូចជាស្ថានភាពនៃការអភិវឌ្ឍសង្គម-សេដ្ឋកិច្ចនៅកម្ពុជា។ បន្ថែមពីនេះ ឯកឧត្តម ក៏បានផ្តល់សេវាពិគ្រោះយោបល់ដល់សមភាគី ផ្តោតសំខាន់លើទិដ្ឋភាពគោលនយោបាយ និងបច្ចេកទេស សំដៅធានាបានថា វិនិយោគិននឹងទទួលបានព័ត៌មានគ្រប់ជ្រុងជ្រោយ ដើម្បីបម្រើជាមូលដ្ឋានដល់ការសិក្សាឆ្ពោះសម្រេចបាននូវការបណ្តាក់ទុន និងពង្រីកការវិនិយោគនៅកម្ពុជា នាពេលដ៏ខ្លីខាងមុខ។

គួរបញ្ជាក់ថា បេសកកម្មគោះទ្វារវិនិយោគមកកាន់ទីក្រុងអូសាកា គឺជាសកម្មភាពតាមដានជាមួយសហគ្រាស ដែលធ្លាប់បានចូលរួមសិក្ខាសាលាស្តីពី ការវិនិយោគនៅកម្ពុជា ដែលបានប្រព្រឹត្តទៅក្រោមអធិបតី សម្តេចធិបតី ហ៊ុន ម៉ាណែត និងព្រឹត្តិការណ៍ជំរុញ និងទាក់ទាញវិនិយោគ ដែលដឹកនាំដោយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា៕