ភ្នំពេញ៖ ក្រសួងព័ត៌មាន ជំរុញឱ្យមានបញ្ឈប់ការផ្សព្វផ្សាយពាណិជ្ជកម្មឱសថបុរាណ និងឱសថគ្រប់ប្រភេទ ដែលគ្មានការអនុញ្ញាតពីក្រសួងសុខាភិបាល ដោយកន្លងមកមានការផ្សព្វផ្សាយលក់ផលិតផលបំប៉នសុខភាព ឈ្មោះ LIVA BALANCE និងឱសថផ្សេងៗទៀត ដោយប្រើប្រាស់ខ្លឹមសារផ្សព្វផ្សាយបំផ្លើសហួសពីការពិត ដែលនាំឱ្យប្រជាពលរដ្ឋមានការភាន់ច្រឡំ និងអាចប៉ះពាល់ដល់សុខភាព។

ដើម្បីចូលរួមការពារផលប្រយោជន៍របស់ប្រជាពលរដ្ឋ និងសុខភាពសាធារណៈ កាត់បន្ថយផលអវិជ្ជមាន នៃការប្រើប្រាស់ផលិតផលបំប៉នសុខភាព និងឱសថ ដែលគ្មានប្រភពច្បាស់លាស់ ក្រសួងព័ត៌មាន បានស្នើដល់ម្ចាស់ប្រព័ន្ធផ្សព្វផ្សាយ ដែលលក់ផលិតផលបំប៉នសុខភាពឈ្មោះ LIVA BALANCE បញ្ឈប់និងលុបមាតិកា ដែលបានផ្សព្វផ្សាយកន្លងមកពាក់ព័ន្ធនឹងផលិតផលខាងលើ និងឱសថគ្រប់ប្រភេទ ដែលគ្មានការអនុញ្ញាតពីក្រសួងសុខាភិបាល។

បន្ថែមលើនេះ ក្រសួងព័ត៌មាន ជំរុញឱ្យម្ចាស់ប្រព័ន្ធផ្សព្វផ្សាយផលិតផលឱសថទាំងអស់ ត្រូវពិនិត្យឱ្យបានច្បាស់លាស់លើលេខបញ្ជីកា និងមានការអនុញ្ញាតពីក្រសួងសុខាភិបាល ដើម្បីចូលរួមទប់ស្កាត់ឱ្យមានប្រសិទ្ធភាពខ្ពស់។ នេះបើយោងតាមសេចក្តីជូនដំណឹងរបស់ក្រសួងព័ត៌មាន នាថ្ងៃទី៦ ខែមិថុនា ឆ្នាំ២០២៥៕