ភ្នំពេញ៖ Blockchain កូនកាត់ (Hybrid Blockchain) គឺជាប្រភេទទី៣ នៃបច្ចេកវិទ្យា Blockchain ដែលជាការរួមបញ្ចូលគ្នានៃ Blockchain ឯកជន និងសាធារណៈ ដោយប្រើប្រាស់លក្ខណៈពិសេស នៃ Blockchains ទាំងពីរប្រភេទនេះ ដែលប្រព័ន្ធផ្អែកលើការអនុញ្ញាត (Permission-based System) និងគ្មានការអនុញ្ញាត (Permission less System) ត្រូវបានប្រើប្រាស់។

ជាមួយនឹងបណ្តាញកូនកាត់បែបនេះ អ្នកប្រើប្រាស់អាចគ្រប់គ្រងថាតើអ្នកណាអាចចូលប្រើទិន្នន័យណាមួយ ដែលបានរក្សាទុកនៅក្នុង Blockchain ដោយមានតែផ្នែកនៃទិន្នន័យ ឬកំណត់ត្រាពី Blockchain ដែលបានជ្រើសរើសប៉ុណ្ណោះ ដែលអាចអនុញ្ញាតឱ្យផ្សព្វផ្សាយជាសាធារណៈ ហើយទិន្នន័យ ឬកំណត់ត្រាដែល នៅសល់ត្រូវរក្សាជាការសម្ងាត់នៅក្នុងបណ្ដាញឯកជន។

Blockchain ប្រភេទនេះ ផ្ដល់នូវដំណោះស្រាយកាន់តែល្អដល់វិស័យសុខាភិបាល អចលនទ្រព្យ និងហិរញ្ញវត្ថុជាដើម ដោយផ្តល់នូវដំណោះស្រាយមួយ ដែលទិន្នន័យត្រូវបានចូលប្រើជាសាធារណៈ ប៉ុន្តែចាំបាច់ត្រូវការពារជាឯកជន៕