ភ្នំពេញ៖ ខេត្តជាំងស៊ូ របស់ប្រទេសចិន បានចុះហត្ថលេខាលើកិច្ចសហប្រតិបតិ្តការវិនិយោគតំបន់សេដ្ឋកិច្ចពិសេសក្រុងព្រះសីហនុ ដែលជាគម្រោងកិច្ចសហប្រតិបត្តិការរវាងចិន និងកម្ពុជា កំពុងមានក្រុមហ៊ុនវិនិយោគចំនួន២០០ តាមរយៈគោលនយោបាយ ខ្សែក្រវ៉ាត់ និងផ្លូវ ។ នេះបើតាមការចុះផ្សាយរបស់ រដ្ឋបាលខេត្តព្រះសីហនុ។

តំបន់សេដ្ឋកិច្ចពិសេសក្រុងព្រះសីហនុ ត្រូវបានរំពឹងថា នឹងទទួលបានការវិនិយោគពី៣០០ ទៅ៤០០ ក្រុមហ៊ុននៅថ្ងៃខាងមុខផងដែរ។ ក្នុងជំនួបជាមួយ ឯកឧត្តម ស៊ូ គុនលីង អភិបាលខេត្តជាំងស៊ូរបស់ប្រទេសចិន កាលពីថ្ងៃទី២១ ខែឧសភា ឆ្នា២០២៥ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានលើកឡើងថា រាជរដ្ឋាភិបាលកម្ពុជា បានយកចិត្តទុកដាក់ក្នុងការអភិវឌ្ឍខេត្តព្រសីហនុ ដោយបានបោះទុនវិនិយោគលើហេដ្ឋារចនាសម្ព័ន្ធជាង ៣០០លានដុល្លារ ក្នុងកសាងផ្លូវក្នុងក្រុងព្រះសីហនុមុនកូវីដ-១៩ ហើយតំបន់សេដ្ឋកិច្ចពិសេសនេះ បានផ្តល់ការងារដល់ពលរដ្ឋជាង ៣ម៉ឺននាក់។បន្ថែមលើនេះ ឯកឧត្តម ម៉ាង ស៊ីណេត ក៏បានអបអរសាទរជើងហោះហើរត្រង់ពីទីក្រុងវ៉ូស៊ី ខេត្តជាំងស៊ូ មកកាន់ខេត្តព្រះសីហនុផងដែរ។

ឯកឧត្តម ស៊ូ គុនលីង បានលើកឡើងថា ខេត្តជាំងស៊ូ ជាប់សមុទ្រភាគខាងកើត នៃប្រទេសចិន មានប្រជាជន ៨៥លាននាក់ មានសេដ្ឋកិច្ចរីកចម្រើន ហើយមានភូមិសាស្ត្រដូចគ្នាជាមួយខេត្តព្រះសីហនុ ដែលនាំឱ្យខេត្តទាំងពីរ អាចបង្កើតបាននូវកិច្ចសហប្រតិបត្តិការលើវិស័យអប់រំ និងសុខាភិបាលរួមគ្នា។ ឯកឧត្តមអភិបាលខេត្តជាំងស៊ូ បានបញ្ជាក់ថា ដំណើរទស្សនកិច្ចនាពេលនេះ គឺផ្តោតសំខាន់ទៅលើការងារមនុស្សធម៌ ដោយបាននាំមកនូវក្រុមគ្រូពេទ្យស្ម័គ្រចិត្តខេត្តជាំងស៊ូ ជួយពិនិត្យព្យាបាលជំងឺបេះដូង និងជំរុញបង្កើតមូលនិធិសប្បុរសធម៌បន្ថែមទៀតនៅកម្ពុជា៕