ភ្នំពេញ៖ ក្នុងរយៈពេល ៤ខែ ឆ្នាំ២០២៥ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញមានចំនួន ១៥៦ ១៥៨ទូ (TEUs) មានការកើនឡើងចំនួន ២៣,៨៩% បើធៀបនឹងរយៈពេលដូចគ្នានៅឆ្នាំ២០២៥ ដែលមានចំនួនកុងតឺន័រ ១២៦ ០៤៨ ទូ។ នេះបើតាមការចុះផ្សាយរបស់កំពង់ផែស្វយ័តភ្នំពេញ កាលពីថ្ងៃទី១៩ ខែឧសភា ឆ្នាំ២០២៥។

កំពង់ផែស្វយ័តភ្នំពេញ បានឱ្យដឹងថា ក្នុងរយៈពេល ៤ខែនេះ បរិមាណនាវា ដែលបានដឹកអ្នកដំណើរចូលចតចំណតផែ មានចំនួន ១៧១គ្រឿង កើនឡើង ១,៧៩% ដែលក្នុងនោះ មានអ្នកដំណើរដែលបានឆ្លងកាត់ចំនួន ១៨ ៥៥១នាក់ កើនឡើង ៨,៤៧% ធៀបនឹងរយៈពេល៤ខែក្នុងឆ្នាំ២០២៤។

ចំពោះ បរិមាណទំនិញ-ប្រេងឥន្ធនៈ ដែលបានឆ្លងកាត់កំពង់ផែស្វយ័តភ្នំពេញវិញ មានចំនួន ១ ៦៩៤ ៤០៨តោន កើនឡើងបាន ២៣,៩៧% បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានចំនួន ១ ៣៦៦ ៧៥៣តោន។ គួរបញ្ជាក់ថា លទ្ធផលការងារអាជីវកម្ម សេវាកម្ម ដែលកំពង់ផែស្វយ័តភ្នំពេញអនុវត្តខាងលើ គឺពុំទាន់ធ្វើសវនកម្មទេ៕