ភ្នំពេញ៖ កម្ពុជា មានសន្និធិបំណុលសាធារណៈសរុបចំនួន ១១,០៩ប៊ីលានដុល្លារ គិតត្រឹមដំណាច់ត្រីមាសទី១ នៃឆ្នាំ២០២៤ ដែលនេះគិតទាំងបំណុលមរតក។ នេះបើតាមព្រឹត្តិបត្រស្ថិតិបំណុលសាធារណៈកម្ពុជាដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុ នាថ្ងៃទី១៤ មិថុនា។

ក្នុងព្រឹត្តិបត្រស្ថិតិបំណុលសាធារណៈកម្ពុជា បានបញ្ជាក់ថា សន្និធិបំណុលសាធារណៈសរុបចំនួន ១១,០៩ប៊ីលានដុល្លាររបស់កម្ពុជា ក្នុងនោះបំណុលប្រមាណ ១១ប៊ីលានដុល្លារ ស្មើនឹង ៩៩,១២% ជាបំណុលសាធារណៈក្រៅប្រទេស និងបំណុលសាធារណៈក្នុងប្រទេសមានចំនួនប្រមាណ ៩៨លានដុល្លារ ស្មើនឹង ០,៨៨%។

ក្នុងត្រីមាសទី១ ឆ្នាំ២០២៤ នេះ រដ្ឋាភិបាលកម្ពុជា បានចុះកិច្ចព្រមព្រៀងឥណទានសម្បទានថ្មីជាមួយដៃគូអភិវឌ្ឍន៍នានាមានចំនួនសរុប ១៤០,១៤លានដុល្លារ ស្មើនឹងប្រមាណ៦% នៃពិតានដែលច្បាប់អនុញ្ញាត ដែលក្នុងនោះ ក្របខ័ណ្ឌទ្វេភាគី ១០០% និងក្របខ័ណ្ឌពហុភាគីមានចំនួន ០%។ គួរបញ្ជាក់ថា ក្នុងត្រីមាសទី១នេះ រដ្ឋាភិបាលកម្ពុជា ក៏បានទូទាត់សេវាបំណុលបានចំនួន ១៨១,៥៥លានដុល្លារ ក្នុងនោះ បំណុលសាធារណៈក្រៅប្រទេសមានចំនួនប្រមាណ ១៨១លានដុល្លារ និងបំណុលសាធារណៈក្នុងប្រទេសមានចំនួនប្រមាណ ០,៥៥លានដុល្លារ៕