ភ្នំពេញ៖ ធនាគារអភិវឌ្ឍន៍ជនបទ និងកសិកម្ម (ARDB) និងសមាគមឥណទានជនបទ និងកសិកម្ម អាស៊ីប៉ាស៊ីហ្វិក (APRACA) ប្រកាសបើកសិក្ខាសាលាស្តីអំពីការលើកកម្ពស់ហិរញ្ញប្បទានបៃតង និងចីរភាព មាគ៌ា និងកាលានុវត្តភាពសម្រាប់គ្រឹះស្ថានហិរញ្ញវត្ថុ ដើម្បីផ្តល់សិទ្ធិអំណាចដល់ស្ថាប័នហិរញ្ញវត្ថុទាំងក្នុងស្រុក និងអន្តរជាតិ ក្នុងការរួមចំណែកយ៉ាងសកម្ម និងមានប្រសិទ្ធភាពជំរុញការផ្លាស់ប្តូរ។

ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជា អគ្គនាយកធនាគារ ARDB បញ្ជាក់ថា សិក្ខាសាលា ដែលរៀបចំឡើងនៅទីស្នាក់ការកណ្តាលរបស់ធនាគារ ARDB ស្ថិតនៅសង្កាត់ព្រែកលៀប ខណ្ឌជ្រោយចង្វាររាជធានីភ្នំពេញនេះ នឹងនាំទៅរកកិច្ចសហការប្រកបដោយអត្ថន័យ និងលទ្ធផល ដែលអាចអនុវត្តបាននឹងជំរុញហិរញ្ញវត្ថុបៃតងឆ្ពោះទៅមុខ។ ឯកឧត្តមបណ្ឌិត កៅ ថាច បានរំលឹកថា អនុស្សរណៈ នៃការយោគយល់គ្នា រវាង ARDB និង APRACA ជាមជ្ឈមណ្ឌលមួយដែលឧទ្ទិសដល់ហិរញ្ញវត្ថុបៃតង និងអាកាសធាតុសម្រាប់វិស័យកសិកម្មនៅក្នុងតំបន់អាស៊ីប៉ាស៊ីហ្វិក។

ធនាគារ ARDB និង ACE-GFA ស្វែងរកការជំរុញការស្រាវជ្រាវ សម្របសម្រួលការផ្លាស់ប្តូរចំណេះដឹង ផ្តល់ការបណ្តុះបណ្តាល ជំរុញការសន្ទនាគោលនយោបាយ ការធ្វើតេស្តសាកល្បងនៃការច្នៃប្រឌិត និងផ្តល់សេវាកម្ម ការប្រឹក្សាយោបល់ ដើម្បីពង្រឹងហិរញ្ញវត្ថុបៃតងប្រកបដោយនិរន្តរភាពនៅក្នុងវិស័យកសិកម្ម។ ឯកឧត្តមបណ្ឌិត កៅ ថាច ក៏បានចាត់ទុកថា ផលប៉ះពាល់នៃបម្រែបម្រួលអាកាសធាតុកំពុងកើតឡើងរួចហើយនៅទូទាំងពិភពលោក ប៉ុន្តែវិស័យកសិកម្ម ជាពិសេស ក្នុងប្រទេសកំពុងអភិវឌ្ឍន៍ មានភាពងាយរងគ្រោះជាពិសេសផងដែរ។ បញ្ហាអាកាសធាតុមិនអាចទាយទុកជាមុនបាន គ្រោះរាំងស្ងួតយូរ និងទឹកជំនន់ខ្លាំង ការគំរាមកំហែងដល់សន្តិសុខស្បៀងរំខានដល់ជីវភាពរស់នៅ និងធ្វើឱ្យភាពក្រីក្រកាន់តែធ្ងន់ធ្ងរនៅក្នុងតំបន់ជនបទ។

លោកបណ្ឌិត Prasun Kumar Das អគ្គលេខាធិការ APRACA ក៏បានបង្ហាញពីហិរញ្ញវត្ថុបៃតង និងនិរន្តរភាព បញ្ហាប្រឈមនៃការប្រែប្រួលអាកាសធាតុ ដែលបញ្ជាក់ពីការវិនិយោគបៃតងក៏ដូចជាឱកាសសម្រាប់ស្ថាប័នហិរញ្ញវត្ថុ រួមទាំងបទពិសោធន៍ពីគ្រឹះស្ថានហិរញ្ញវត្ថុអាកាសធាតុកម្ពុជា (CCFF) ក្រោមមូលនិធិអាកាសធាតុបៃតង (GCF)។ បន្ទាប់មកសិក្ខាសាលាខាងលើនេះ ក៏មានការពិភាក្សាជាក្រុម ដែលអ្នកជំនាញចូលរួមក្នុងកិច្ចសន្ទនាលើប្រធានបទសំខាន់ៗទាំងនេះ ដោយផ្តោតលើដំណោះស្រាយជាក់ស្តែង យុទ្ធសាស្ត្រ និងឱកាសសម្រាប់ការជំរុញហិរញ្ញវត្ថុបៃតង និងនិរន្តរភាពនៅក្នុងតំបន់៕