ភ្នំពេញ៖ ថ្នាក់ដឹកនាំកម្ពុជា និងចិន ប្រកាសលើកទឹកចិត្តដល់ស្ថាប័នប្រព័ន្ធផ្សព្វផ្សាយសារព័ត៌មានបោះពុម្ពផ្សាយ វិទ្យុ ភាពយន្ត និងទូរទស្សន៍នៃប្រទេសទាំងពីរ ពង្រឹងកិច្ចសហប្រតិបត្តិការគ្នារួមគ្នា ខណៈភាគីទាំងពីរ បានឯកភាពអនុវត្តកិច្ចព្រមព្រៀង ស្តីពីកិច្ចសហប្រតិបត្តិការវិទ្យុ និងទូរទស្សន៍ ដើម្បីជំរុញការផ្លាស់ប្តូរ និងកិច្ចសហការលើបច្ចេកវិទ្យាផ្សាយ និងសោតទស្សន៍ ឧស្សាហកម្ម មាតិកា និងការបណ្តុះបណ្តាលធនធានមនុស្ស។

រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា ក៏បានចុះហត្ថលេខាលើកិច្ចព្រមព្រៀងសហប្រតិបត្តិការលើកិច្ចការប្រព័ន្ធផ្សព្វផ្សាយជាមួយភាគីចិនផងដែរ។ ការចុះហត្ថលេខា និងការលើកទឹកចិត្តខាងលើនេះ បានធ្វើឡើងក្នុងដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង មកកាន់ប្រទេសកម្ពុជា រយៈពេល២ថ្ងៃ ចាប់ពីថ្ងៃទី១៧-១៨ ខែមេសា ឆ្នាំ២០២៥។ នេះបើតាមសេចក្តីថ្លែងការណ៍រួមរវាងកម្ពុជា និងចិន ស្តីពីការកសាងសហគមន៍វាសនារួម គ្រប់រដូវកាល ក្នុងយុគសម័យថ្មី និងការអនុវត្តគំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល កម្ពុជា និងចិន៕