ភ្នំពេញ៖ ក្នុងរយៈពេល ៣ខែ ឆ្នាំ២០២៥ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញមានចំនួន ១២១ ៤២៥ទូ (TEUs) មានការកើនឡើងចំនួន ៣០,៣៥% បើធៀបនឹងរយៈពេល ៣ខែ ឆ្នាំ២០២៤ ដែលមានចំនួន ៩៣ ១៥៣ទូ។ នេះបើតាមការចុះផ្សាយរបស់កំពង់ផែស្វយ័តភ្នំពេញ នាថ្ងៃទី០៩ ខែមេសា ឆ្នាំ២០២៥។

កំពង់ផែស្វយ័តភ្នំពេញ បានឱ្យដឹងថា រយៈពេល ៣ខែនេះ បរិមាណនាវា ដែលបានដឹកអ្នកដំណើរចូលចតចំណតផែ មានចំនួន ១៤១គ្រឿង ថយចុះ ១,៤០% ដែលក្នុងនោះ មានអ្នកដំណើរដែលបានឆ្លងកាត់ចំនួន ១៥ ៥២៥នាក់ កើនឡើង ៨,៥៧% ធៀបនឹងរយៈពេលដូចគ្នា ក្នុងឆ្នាំ២០២៤។

ចំពោះ បរិមាណទំនិញ-ប្រេងឥន្ធនៈ ដែលបានឆ្លងកាត់កំពង់ផែស្វយ័តភ្នំពេញ ក្នុងរយៈពេល ៣ខែ ឆ្នាំ២០២៥ វិញ មានចំនួន ១ ២៩៥ ៦៨៥តោន កើនឡើងបាន ៣១,៨២% បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានចំនួន ៩៨២ ៩០០តោន។ គួរបញ្ជាក់ថា លទ្ធផលការងារអាជីវកម្ម សេវាកម្ម ដែលកំពង់ផែស្វយ័តភ្នំពេញអនុវត្តសម្រាប់រយៈពេល ៣ខែ ឆ្នាំ២០២៥ នេះ គឺពុំទាន់ធ្វើសវនកម្មទេ៕