ភ្នំពេញ៖ ធនាគារជាតិនៃកម្ពុជា សម្រេចអនុញ្ញាតឱ្យគ្រប់គ្រឹះស្ថានធនាគារនិងហិរញ្ញវត្ថុ រៀបចំឥណទានឡើងវិញជូនដល់អតិថិជន ដែលជួបប្រទះការលំបាកផ្នែកហិរញ្ញវត្ថុបណ្តោះអាសន្ន ស្របតាមលក្ខខណ្ឌកំណត់ក្នុងសារាចរណែនាំ។ នេះបើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី២៣ ខែសីហា ឆ្នាំ២០២៤។

ដើម្បីផ្ដល់លទ្ធភាពបន្ថែមឱ្យគ្រឹះស្ថានបញ្ចេញឥណទាន និងចូលរួមចំណែកជំរុញកំណើនសេដ្ឋកិច្ចជាតិ ធនាគារជាតិ សម្រេចអនុញ្ញាតឱ្យគ្រឹះស្ថានបន្តអនុវត្តអនុភាពទ្រនាប់ដើមទុនខនស៊ីវសិន ត្រឹមកម្រិត ១,២៥% រហូតដល់ថ្ងៃទី៣១ ខែធ្នូ ឆ្នាំ២០២៥។ លើសពីនេះ គ្រឹះស្ថានធនាគារនិងហិរញ្ញវត្ថុ ត្រូវបន្តអនុវត្តអត្រាប្រាក់បម្រុងកាតព្វកិច្ចរូបិយប័ណ្ណត្រឹមកម្រិត ៧% រហូតដល់ថ្ងៃទី៣១ ខែធ្នូឆ្នាំ២០២៥ ផងដែរ។

គ្រឹះស្ថានទាំងអស់ ត្រូវបញ្ចេញឥណទានប្រកបដោយការយកចិត្តទុកដាក់ខ្ពស់ ដើម្បីធានាបាននូវ កំណើនប្រកបដោយចីរភាព និងរួមចំណែករក្សាស្ថិរភាពប្រព័ន្ធធនាគារទាំងមូល។ ពាក់ព័ន្ធនឹងករណីនេះ ធនាគារជាតិ នឹងបន្តតាមដានដោយយកចិត្តទុកដាក់លើស្ថិរភាពប្រព័ន្ធធនាគារ និងប្រសិទ្ធភាពនៃការអនុវត្តវិធានការអនុគ្រោះខាងលើ៕