ភ្នំពេញ៖ ធនាគារជាតិនៃកម្ពុជា រៀបចំកម្មវិធីប្រកួតផលិតវីដេអូខ្លី ក្រោមប្រធានបទ៖ «តើប្រាក់ ១ម៉ឺនរៀល អាចទិញអ្វីបានខ្លះនៅខេត្តតាកែវ?» ដើម្បីអបអរសាទរខួបលើកទី៤៥ នៃការដាក់ឱ្យចរាចរប្រាក់រៀលឡើងវិញ។

ចំពោះលក្ខខណ្ឌចូលរួមប្រកួត រួមមានត្រូវថតនៅទីតាំងក្នុងខេត្តតាកែវ, វីដេអូត្រូវមានរយៈពេលពី ៤០វិនាទី ដល់ ៣នាទី, តាមដាន (Follow) ទំព័រហ្វ៊េសប៊ុកផ្លូវការធនាគារជាតិ, ផ្សព្វផ្សាយវីដេអូនៅលើគណនីហ៊្វេសបុក ឬ Tiktok ផ្ទាល់ខ្លួន ដោយមានភ្ជាប់ចំណងជើង #ទិវាប្រាក់រៀល២០២៥ #ខ្ញុំស្រឡាញ់ប្រាក់រៀល និង #ធនាគារជាតិនៃកម្ពុជា និង mention គណនីបណ្ដាញសង្គមផ្លូវការធនាគារជាតិ (ធនាគារជាតិ នៃកម្ពុជា - National Bank of Cambodia) និង (@nationalbankofcambodia_នៅលើ Tiktok) និងបង្កប់អត្ថន័យពីសារៈសំខាន់ ការប្រើប្រាស់ប្រាក់រៀល ឬការប្រើប្រាស់ប្រាក់រៀលតាមបែបឌីជីថល។

ជ័យលាភីលេខ១ នឹងទទួលបានទឹកប្រាក់ចំនួន ២លានរៀល និងជ័យលាភីលេខ២ ទទួលបានទឹកប្រាក់ចំនួន ១លានរៀល ដោយក្នុងនោះជ័យលាភី នឹងទទួលរង្វាន់នៅក្នុងសិក្ខាសាលាផ្សព្វផ្សាយ ស្តីពី ប្រាក់រៀល ប្រព័ន្ធបាគង និងខេអេចឃ្យូអរ (KHQR) ដែលនឹងធ្វើឡើងនៅខេត្តតាកែវ នាថ្ងៃទី៣០ ខែមេសា ឆ្នាំ២០២៥។ សូមជម្រាបថា បេក្ខជន ត្រូវផ្ញើតំណភ្ជាប់វីដេអូ ដែលបានផ្សព្វផ្សាយមកក្នុងប្រអប់សារ នៃហ្វ៊េសបុកផ្លូវការធនាគារជាតិនៃកម្ពុជា ត្រឹមថ្ងៃទី២៥ ខែមេសា ឆ្នាំ២០២៥ ផងដែរ៕