ភ្នំពេញ៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា «សួនឧស្សាហកម្មវាយនភណ្ឌបៃតងកម្ពុជា» គឺជាគម្រោងវិនិយោគសេដ្ឋកិច្ចយុទ្ធសាស្រ្ត ដែលនឹងផ្តល់ឱកាសឱ្យកម្ពុជា ក្លាយជាមូលដ្ឋានផលិតកម្ម និងទីតាំងផ្គត់ផ្គង់លើវិស័យឧស្សាហកម្ម បោះពុម្ព ជ្រលក់ពណ៌ និងអេឡិចកូប្លាតីងស្បែក ក្នុងតំបន់អាស៊ាន។

គម្រោងស្ថិតលើផ្ទៃដីជាង ៥០០ហិកតា នៅភូមិឈើនាង ឃុំតាំងស្យា ស្រុកភ្នំស្រួច ខេត្តកំពង់ស្ពឺនេះ ត្រូវបានរាជរដ្ឋាភិបាលកម្ពុជាគាំទ្រ ព្រោះការបង្កើតសួនឧស្សាហកម្មនេះ នឹងផ្តល់ការងារប្រមាណ ៥-៦ម៉ឺនកន្លែងបន្ថែមទៀតដល់ប្រជាពលរដ្ឋ។ គម្រោងនេះផងដែរ ឯកឧត្តមរដ្ឋមន្ត្រីក្រសួងការងារ សង្ឃឹមថា អាជ្ញាធរ និងមន្ទីរពាក់ព័ន្ធ នឹងមានកិច្ចសហការធ្វើយ៉ាងណាឱ្យចេញជារូបរាង និងក្លាយជាទីតាំងដ៏សំខាន់ក្នុងវិស័យឧស្សាហកម្ម និងការវិនិយោគ ក្នុងខេត្តកំពង់ស្ពឺ និងជាគំរូមួយ ដែលទាក់ទាញអ្នកវិនិយោគថ្មីៗទៀត។

ក្នុងពិធីបញ្ចុះបឋមសិលាបើកការដ្ឋានសាងសង់សួនឧស្សាហកម្មវាយនភណ្ឌបៃតងនេះ ឯកឧត្តម ហេង សួរ ក៏បានអញ្ជើញជាអធិបតី ក្នុងពិធីចុះហត្ថលេខាលើអនុស្សរណៈនៃការយោគយល់គ្នា(MOU) រវាងវិទ្យាស្ថានពហុបច្ចេកទេសកម្ពុជាខេត្តកំពង់ស្ពឺ និងអង្គការ Yu Jianging Charity Organization for Education ផងដែរ។ ការចុះ MOU នេះ គឺដើម្បីពង្រឹងគុណភាពអប់រំ បង្កើនសមត្ថភាពរបស់បុគ្គលិកនៃវិទ្យាស្ថាន និងជួយគាំទ្រដល់សិស្សនិស្សិត ក្នុងខេត្តកំពង់ស្ពឺ តាមរយៈការបណ្តុះបណ្តាល និងផ្តល់ធនធានពាក់ព័ន្ធនានាជូនដល់គ្រូបង្គោល និងសិក្ខាកាមរបស់វិទ្យាស្ថាន៕