ភ្នំពេញ៖ គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស ដែលមានទំហំទឹកប្រាក់ចំនួន ៨៣.៩២លានដុល្លារ ត្រូវបានក្រសួងអប់រំ យុវជន និងកីឡា ប្រកាសអនុវត្តជាផ្លូវការ។ គម្រោងនេះ មានរយៈពេល ៦ឆ្នាំ ដែលចាប់ពីខែមីនា ឆ្នាំ២០២៥ ដល់ ខែមិថុនា ឆ្នាំ២០៣១។ នេះបើតាមការចុះផ្សាយរបស់ក្រសួងអប់រំ នាថ្ងៃទី០២ ខែមេសា ឆ្នាំ២០២៥។

ទំហំទឹកប្រាក់ដែលមានទំហំជិត ៨៤លានដុល្លាននេះ គឺទទួលបានហិរញ្ញប្បទានពីធនាគារអភិវឌ្ឍន៍អាស៊ី ៨០លានដុល្លារ និងបដិភាគរបស់រដ្ឋាភិបាល ៣.៩២លានដុល្លារ។ គម្រោងនេះ ផ្តោតលើការបង្កើនលទ្ធភាពទទួលបានការអប់រំមធ្យមសិក្សា ទុតិយភូមិ ប្រកបដោយគុណភាព, ការលើកកម្ពស់គុណភាពនៃការអប់រំមធ្យមសិក្សាទុតិយភូមិស្របតាម ជំនាញសតវត្សទី២១, ការបង្កើនគុណភាពនៃរង្វាយតម្លៃការអប់រំមធ្យមសិក្សាទុតិយភូមិ, ការរៀបចំ គន្លងអប់រំក្រោយមធ្យមសិក្សា។

គម្រោងនេះ បានជ្រើសរើសវិទ្យាល័យគោលដៅចំនួន ២៥៩សាលា ដើម្បីអភិវឌ្ឍន៍ទាំងផ្នែករឹង និងផ្នែកទន់ ដោយក្នុងនោះការអភិវឌ្ឍផ្នែករឹង គឺសម្រាប់ការសាងសង់ និងបំពាក់បន្ទប់សិក្សាបន្ថែមចំនួន ៤១៤ និងសម្ភារបរិក្ខារទឹក និងអនាម័យ រួមទាំងបង្គន់ចំនួន៣០០ នៅក្នុងសាលារៀនចំនួន២៣ ដែលមានសិស្សច្រើន។ បន្ថែមលើនេះ ការអភិវឌ្ឍផ្នែករឹង ក៏សម្រាប់ការកែលម្អ និងបំពាក់សម្ភារបរិក្ខារមធ្យមសិក្សាទុតិយភូមិដែលមានស្រាប់ ដើម្បីលើកកម្ពស់វិទ្យាសាស្ត្រ បែបអនុវត្ត និងការបង្រៀន និងរៀនក្រៅកម្មវិធីសិក្សា ព្រមទាំងការបង្កើត និងបំពាក់មជ្ឈមណ្ឌលទិន្នន័យអប់រំបរិយាបន្នផងដែរ។

គម្រោងខាងលើគាំទ្រដល់ការលើកកម្ពស់ការអប់រំវិទ្យាសាស្ត្រ និងបច្ចេកវិទ្យា នៅកម្រិតសាលារៀន ជាពិសេសនៅកម្រិតមធ្យមសិក្សា មកទល់ពេលបច្ចុប្បន្នវិទ្យាល័យធនធានមានចំនួន៦៧ កំពុងដើរតួនាទីយ៉ាងសកម្មក្នុងការជំរុញការអប់រំវិទ្យាសាស្ត្រ និងបច្ចេកវិទ្យា ឬការអប់រំស្ទែម (STEM) តាមរយៈការអនុវត្តពិសោធន៍វិទ្យាសាស្ត្រ នៅក្នុងបន្ទប់ពិសោធន៍វិទ្យាសាស្ត្រ បន្ទប់ ICT បន្ទប់ពហុបំណង និងបណ្ណាល័យសតវត្សទី២១ និងការជួយគាំទ្រដល់វិទ្យាល័យបណ្តាញ៕