ភ្នំពេញ៖ ច្បាប់វិនិយោគផ្តល់កញ្ចប់លើកទឹកចិត្តសម្រាប់ការវិនិយោគផ្ទាល់ពីបរទេសលើ «គម្រោងវិនិយោគមាន លក្ខណៈសម្បត្តិគ្រប់គ្រាន់» ដែលទទួលស្គាល់ដោយក្រុមប្រឹក្សាអភិវឌ្ឍន៍កម្ពុជា មានយន្តការលើកទឹកចិត្តសម្រាប់ការវិនិយោគ រួមមាន៖ ការលើកលែងពន្ធលើប្រាក់ចំណូលរហូតដល់ ៩ឆ្នាំ។

ការលើកលែងពន្ធនេះ គឺអាស្រ័យលើលក្ខណៈសម្បត្តិនៃគម្រោងវិនិយោគ ការលើកលែងពន្ធនាំចូល លើគ្រឿងម៉ាស៊ីន ឧបករណ៍ ធាតុចូលសម្រាប់ផលិតកម្ម វត្ថុធាតុដើម និងសម្ភារផ្សេងៗទៀត ដែលរាជរដ្ឋាភិបាល កំពុងធ្វើវិសោធនកម្មច្បាប់ស្តីពីវិនិយោគ។ ទន្ទឹមនឹងនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងជួយសម្របសម្រួលជាមួយក្រសួងសេដ្ឋកិច្ច និងហិរញ្ញវត្ថុ និងក្រុមប្រឹក្សាអភិវឌ្ឍន៍កម្ពុជា ដើម្បីស្នើបញ្ចូលកញ្ចប់លើកទឹកចិត្តទៅក្នុងច្បាប់សម្រាប់ទាក់ទាញវិនិយោគិនអន្តរជាតិ។

ច្បាប់សម្រាប់ទាក់ទាញវិនិយោគិនអន្តរជាតិដែលវិនិយោគក្នុងវិស័យមួយចំនួនដូចជា វិនិយោគក្នុងវិស័យដែលផ្អែកលើបច្ចេកវិទ្យាជាមូលដ្ឋាន, វិនិយោគលើសកម្មភាពនៃការស្រាវជ្រាវនិងអភិវឌ្ឍន៍ ឬសកម្មភាពនៃការផ្ទេរបច្ចេកវិទ្យានិងចំណេះដឹង, ការប្តេជ្ញាចិត្តសហការជាមួយសហគ្រាសធុនតូចនិងមធ្យម និងអ្នកផ្គត់ផ្គង់ក្នុងស្រុកតាមរយៈការផ្ទេរបច្ចេកវិទ្យា និងចំណេះដឹង និងការសហការជាមួយគ្រឹះស្ថានឧត្តមសិក្សាក្នុងស្រុក និងស្ថាប័នស្រាវជ្រាវសាធារណៈផ្សេងៗ លើកម្មវិធីបណ្តុះបណ្តាលការស្រាវជ្រាវនិងអភិវឌ្ឍន៍៕