ភ្នំពេញ៖ កម្ពុជា និងជប៉ុន ពង្រឹងកិច្ចសហប្រតិបត្តិការទ្វេភាគីលើវិស័យកសិកម្ម និងពិភាក្សាពីគម្រោងវិនិយោគលើការកែច្នៃគ្រឿងសម្អាង កែច្នៃខ្នុរជាទឹកស៊ីរ៉ូ និងការធ្វើវារីវប្បកម្មត្រីទីឡាព្យា ដើម្បីជំរុញការកែច្នៃក្នុងស្រុក និងនាំចេញទៅកាន់ទីផ្សារអន្តរជាតិ។ នេះបើតាមការចុះផ្សាយរបស់ ក្រសួងកសិកម្ម រុក្ខាប្រមាញ់ និងនេសាទ។

ក្នុងជំនួបជាមួយ ឯកឧត្តម តាកាហាស៊ី ហ្វូមីអាគី (Takahashi Fumiaki) ប្រធានសមាគមជប៉ុន-កម្ពុជា កាលពីថ្ងៃទី១ ខែមេសា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា កម្ពុជា មានកសិផលសក្តានុពលជាច្រើន ដូចជាអង្ករប្រណិត ម្រេច ស្ករត្នោត និងស្វាយចន្ទី ដែលមានគុណភាពខ្ពស់ រសជាតិឆ្ងាញ់។ គុណភាពនេះ ភាគីជប៉ុន អាចពិចារណាវិនិយោគកែច្នៃជាមួយនឹងតម្លៃបន្ថែមខ្ពស់ ត្រូវចេះបង្កើតស្លាកយីហោល្អ និងមានការធ្វើទីផ្សារត្រឹមត្រូវ ដោយក្នុងនោះក្រសួង នឹងជួយគាំទ្រផ្នែកបច្ចេកទេស។

ភាគីទាំងពីរ បានឯកភាពពង្រឹងកិច្ចសហប្រតិបត្តិការរួមគ្នា លើវិស័យកសិកម្ម។ ក្នុងកិច្ចពិភាក្សាដដែលនោះ ឯកឧត្តមរដ្ឋលេខាធិការ ប្រាក់ ដាវីដ បានលើកឡើងពីកម្មវិធីវេទិកា និងពិព័រណ៍កសិកម្មកម្ពុជា(CAFE25) និងបានអំពាវនាវដល់គណៈប្រតិភូជប៉ុន ឱ្យចូលរួមព្រឹត្តិការណ៍នេះ ដើម្បីស្វែងយល់ និងស្វែងរកនូវសក្ដានុពលវិនិយោគបន្ថែមទៀតផងដែរ៕