ភ្នំពេញ៖ សារព័ត៌មានរបស់ថៃ The Nation Thailand បានចុះផ្សាយថា៖ «មូលហេតុមួយនៃការលុបចោល កម្មវិធី Miss Grand International (MGI) ២០២៤ នៅកម្ពុជា គឺមកពីឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ មិនបានចូលរួមសន្និសីទកាសែតក្នុងកម្មវិធីនេះតាមការសន្យា»។ ពាក់ព័ន្ធនឹងខ្លឹមសារនេះ ក្រសួងទេសចរណ៍ បានបដិសេធទាំងស្រុង និងស្នើឱ្យស្ថាប័នមួយនេះ កែតម្រូវ និងបញ្ឈប់ការផ្សាយមិនពិតពីកម្ពុជា។

ក្រសួងទេសចរណ៍ លើកឡើងថា ការចុះផ្សាយរបស់សារព័ត៌មានថៃខាងលើគឺមិនត្រឹមត្រូវ និងបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយសរបស់ក្រសួងទេសចរណ៍កម្ពុជា។ សេចក្តីប្រកាសរបស់ក្រសួងទេសចរណ៍ បានឱ្យដឹងថា ឯកឧត្តម ហួត ហាក់ បានជួបតំណាងក្រុមហ៊ុនសិទ្ធិផ្តាច់មុខរៀបចំកម្មវិធី MGI ២០២៤ នៅកម្ពុជា, តំណាងកម្មវិធី MGI និងបេក្ខនារីដែលមកពី ៧៥ប្រទេស កាលពីថ្ងៃទី៦ តុលា ក្នុងនោះឯកឧត្តមរដ្ឋមន្ត្រីទេសចរណ៍ បានរីករាយដែលកម្មវិធី MGI ២០២៤ ចូលរួមផ្សព្វផ្សាយអំពីវប្បធម៌ និងទេសចរណ៍នៅកម្ពុជា។

ទាក់ទងនឹងកម្មវិធីខាងលើ ក្រសួងទេសចរណ៍ បានជួយសម្របសម្រួលជាមួយបណ្តាក្រសួង-ស្ថាប័នពាក់ព័ន្ធលើបែបបទ ចេញ-ចូលកម្ពុជា និងការចូលទស្សនារមណីយដ្ឋាននានា។ ឯកឧត្តមរដ្ឋមន្ត្រីក្រសួងទេសចរណ៍ គឺមិនធ្លាប់បានសន្យាថានឹងចូលរួមសន្និសីទកាសែត ឬកម្មវិធីណាមួយផ្សេងទៀត ក្រៅអំពីការទទួលជួបសំណេះសំណាល កាលពីថ្ងៃទី៦ ខែតុលា ឆ្នាំ២០២៤ នេះឡើយ៕