ភ្នំពេញ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា អំពាវនាវដល់ម្ចាស់កម្មសិទ្ធិអចលនវត្ថុទាំងអស់ឱ្យបង្កើនការប្រុងប្រយ័ត្នខ្ពស់ និងចៀសវាងការយកបណ្ណកម្មសិទ្ធិទៅដាក់បញ្ចាំ ដើម្បីទទួលកម្ចីពីក្រុមចងការខុសច្បាប់ដែលគិតអត្រាការប្រាក់ខ្ពស់ហួសហេតុ និងកេងចំណេញលើសលប់ ដែលជាហេតុនាំឱ្យកើតមានបន្ទុកបំណុលធ្ងន់ធ្ងរ និងប៉ះពាល់ដល់ជីវភាពរស់នៅប្រចាំថ្ងៃ។

ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋរស់នៅក្នុងឃុំឈូក ស្រុកប្រាសាទសំបូរ ខេត្តកំពង់ធំ លោកជំទាវបណ្ឌិត ជា សិរី ក៏បានលើកឡើងពីសារសំខាន់នៃបណ្ណកម្មសិទ្ធិ ដែលជាផ្នែកដ៏សំខាន់នៃទ្រព្យសម្បត្តិរបស់ក្រុមគ្រួសារនីមួយៗសម្រាប់បែងចែកមរតក តកូនតចៅផង និងជាឯកសារសំខាន់សម្រាប់ធានាការទទួលឥណទានសម្រាប់បង្កើតអាជីវកម្ម ឬការងារបង្កបង្កើនផលកសិកម្មផង។

ជាមួយគ្នានេះ ទេសាភិបាលធនាគារជាតិនៃកម្ពុជា ក៏បានបញ្ជាក់ពីការធានាបាននូវភាពជាម្ចាស់កម្មសិទ្ធិលើអចលនទ្រព្យ និងការអភិវឌ្ឍសេដ្ឋកិច្ច-សង្គម ក៏ដូចជាជីវភាពរស់នៅប្រចាំថ្ងៃរបស់ប្រជាពលរដ្ឋ៕