ភ្នំពេញ៖ ក្រសួងប្រៃសណីយ៍ និងទូរគមនាគមន៍ (ក.ប.ទ.) នឹងរៀបចំសិក្ខាសាលាផ្សព្វផ្សាយលើកទី១ ស្តីពី «ការរៀបចំយុទ្ធសាស្ត្រជាតិស្ដីពីបញ្ញាសិប្បនិម្មិត» ដល់ក្រសួង ស្ថាប័ន សហគ្រាស ក្រុមហ៊ុនឯកជន និងសាធារណជនទូទៅ នាថ្ងៃទី២៤ ខែមីនា ឆ្នាំ២០២៥។

សិក្ខាសាលាផ្សព្វផ្សាយខាងលើ នឹងធ្វើឡើងក្រោមប្រធានបទ៖ «វឌ្ឍនភាព នៃការរៀបចំយុទ្ធសាស្ត្រជាតិស្ដីពីបញ្ញាសិប្បនិម្មិត» ដើម្បីផ្សព្វផ្សាយអំពីវឌ្ឍនភាពនៃការរៀបចំ «យុទ្ធសាស្ត្រជាតិស្ដីពីបញ្ញាសិប្បនិម្មិត» បញ្ជ្រាបការយល់ដឹង និងប្រមូលធាតុចូលបន្ថែមពីសហគមន៍អ្នកជំនាញ អ្នកបច្ចេកទេស និងគ្រប់តួអង្គពាក់ព័ន្ធ។ កម្មវិធីនេះ នឹងប្រព្រឹត្តទៅវេលាម៉ោង ១:៣០នាទីរសៀល ដល់ម៉ោង ៥:០០នាទីរសៀល នៅទីស្ដីការ ក.ប.ទ.។

ក្នុងព្រឹត្តិការណ៍នេះ ក្រសួងប្រៃសណីយ៍ នឹងអនុញ្ញាតឱ្យអ្នកជំនាញ និងអ្នកបច្ចេកទេសបញ្ញាសិប្បនិម្មិតនិងវិទ្យាសាស្ត្រទិន្នន័យ ព្រមទាំងនិស្សិតមកពីគ្រប់ស្ថាប័ន ចូលរួមសិក្ខាសាលានេះដោយផ្ទាល់ចំនួន ៣០នាក់ ដោយតម្រូវឱ្យចុះឈ្មោះជាមុន តាមរយៈតំណភ្ជាប់ https://form.gov.kh/67d2b4eb093810001154717e។ នេះបើតាមការចុះផ្សាយរបស់ក្រសួងប្រៃសណីយ៍ នាថ្ងៃទី២២ ខែមីនា ឆ្នាំ២០២៥៕