ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោក ឃុន សែន ប្រធានសភាពាណិជ្ជកម្មកម្ពុជាប្រចាំទីក្រុងស៊ីដនី ប្រទេសអូស្ត្រាលី ពិភាក្សាពិនិត្យលទ្ធភាពក្នុងការរៀបចំឱ្យមាន Trade shows និងការផ្គូផ្គងពាណិជ្ជកម្ម (Business Matching) រវាងប្រតិបត្តិករទេសចរណ៍កម្ពុជា និងអូស្រ្តាលី។

ក្រៅពីកិច្ចពិភាក្សាខាងលើ ភាគីទាំងពីរ បានជជែកការងារ ស្តីពីកិច្ចសហប្រតិបត្តិការលើវិស័យទេសចរណ៍ និងកិច្ចសហការលើការជំរុញការផ្សព្វផ្សាយសក្តានុពលទេសចរណ៍កម្ពុជា ទៅកាន់ប្រជាជន និងជនបរទេស ដែលរស់នៅ និងធ្វើពាណិជ្ជកម្មក្នុងប្រទេសអូស្រ្តាលី ព្រមទាំងការជួយជ្រោមជ្រែងទាក់ទាញនូវវិនិយោគិនអូស្រ្តាលី ឱ្យមកវិនិយោគក្នុងឧស្សាហកម្មទេសចរណ៍នៅកម្ពុជា ផងដែរ។ បើតាមការចុះផ្សាយរបស់ក្រសួងទេសចរណ៍ ឯកឧត្តម ហួត ហាក់ និងលោក ឃុន សែន បានពិភាក្សាគ្នា នៅទីស្ដីការក្រសួងទេសចរណ៍ កាលពីថ្ងៃទី១៩ ខែមីនា ឆ្នាំ២០២៥៕