ភ្នំពេញ៖ ឯកឧត្ដម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការអន្ដរក្រសួង ដើម្បីសិក្សានិងដោះស្រាយបញ្ហាបាក់ច្រាំងទន្លេបាសាក់និងព្រែកជ្រៃធំនៅតាមបណ្ដោយព្រំដែនកម្ពុជា-វៀតណាម កាលពីថ្ងៃទី១៤ ខែមីនា ឆ្នាំ២០២៥ នៅបន្ទប់ប្រជុំខេត្ដសៀមរាបនៃទីស្ដីការក្រសួងមហាផ្ទៃ។ នេះបើតាមការចុះផ្សាយរបស់រដ្ឋលេខាធិការដ្ឋានកិច្ចការព្រំដែន កាលពីថ្ងៃទី១៤ ខែមីនា ឆ្នាំ២០២៥។

ជាមួយគ្នានេះ ឯកឧត្ដម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ បានរាយការណ៍ជូនអង្គប្រជុំអំពីវឌ្ឍនភាពការងារជារួមពាក់ព័ន្ធនឹងដំណើរការនៃការដោះស្រាយបញ្ហាបាក់ច្រាំងទន្លេបាសាក់និងព្រែកជ្រៃធំនៅតាមបណ្ដោយព្រំដែនកម្ពុជា-វៀតណាម។ ឯកឧត្ដម ឡាំ ជា ក៏បានអនុញ្ញាតឱ្យក្រសួងធនធានទឹកនិងឧតុនិយម ធ្វើបទបង្ហាញស្ដីពីគម្រោងការពារច្រាំងទន្លេបាសាក់ និងតំណាងក្រសួងសាធារណការនិងដឹកជញ្ជូន ធ្វើបទបង្ហាញស្ដីពីស្ថានភាពច្រាំងនៅតាមបណ្ដោយព្រែកជ្រៃធំ-ព្រែកប៊ិញយី តាមបណ្ដោយព្រំដែនកម្ពុជា-វៀតណាម។

ក្រោយពីបានពិនិត្យ និងពិភាក្សារួច ឯកឧត្ដម ឡាំ ជា បានកោតសរសើរ និងវាយតម្លៃខ្ពស់ចំពោះឯកឧត្តម លោក លោកស្រី ដែលបានចូលរួមមតិយោបល់យ៉ាងផុសផុល ដែលនឹងក្លាយជាធាតុចូលបំពេញបន្ថែមជូនក្រុមការងារបច្ចេកទេសទទួលបន្ទុក។ បន្ថែមពីលើនេះ ឯកឧត្ដម ឡាំ ជា ក៏បានផ្ដល់អនុសាសន៍ណែនាំ និងតម្រង់ទិសដល់ក្រុមការងារ សម្រាប់ជាមូលដ្ឋានក្នុងការរៀបចំផែនការអនុវត្ត ដើម្បីជំរុញវឌ្ឍនភាពការងារថែមមួយកម្រិតទៀតផងដែរ៕