ភ្នំពេញ៖ ទ្រព្យសកម្មរបស់ប្រព័ន្ធធនាគារមានកំណើន៧% គិតជាទឹកប្រាក់មានប្រមាណ ៩១,១ប៊ីលានដុល្លារ ក្នុងឆ្នាំ២០២៤ ដែលបង្ហាញថា ប្រព័ន្ធធនាគារបន្តរក្សាបានវឌ្ឍនភាព និងមានស្ថិរភាព ដែលបានរួមចំណែកគាំទ្រការងើបឡើង នៃសេដ្ឋកិច្ច។ នេះបើតាមរបាយកាណ៍របស់ធនាគារជាតិនៃកម្ពុជា ប្រចាំឆ្នាំ២០២៤។

តាមរបាយការណ៍ដដែល បានបង្ហាញថា ឥណទានបន្តមានកំណើនទាបត្រឹម៣% ដែលមានទំហំទឹកប្រាក់ស្មើនឹង ៥៩,៩ប៊ីលានដុល្លារ ខណៈដែលប្រាក់បញ្ញើបានកើនឡើង១៦,៣% ស្មើ ៥៧ប៊ីលានដុល្លារ។ស្ថានភាពដើមទុន មានភាពរឹងមាំ ដោយអនុបាតភាពគ្រប់គ្រាន់នៃដើមទុនមានកម្រិត២២,៥% សម្រាប់វិស័យធនាគារ និង២៦,២% សម្រាប់វិស័យមីក្រូហិរញ្ញវត្ថុ ធៀបនឹងកម្រិតកំណត់នៃបទប្បញ្ញត្តិ១៥% ស្របពេល ដែលទ្រនាប់ដើមទុនខនស៊ើវេសិនត្រូវបានអនុវត្តត្រឹម ១,២៥%។

ជាមួយគ្នានេះ សន្ទនីយភាពបន្តមានកម្រិតខ្ពស់ ដោយអនុបាតក្របខ័ណ្ឌសន្ទនីយភាពមានអត្រា ១៩២,៤% សម្រាប់វិស័យធនាគារ និង ១៥០,៤% សម្រាប់វិស័យមីក្រូហិរញ្ញវត្ថុ ធៀបនឹងកម្រិតកំណត់នៃបទប្បញ្ញត្តិ ១០០%៕