ភ្នំពេញ៖ សហគ្រាសធុនតូច និងមធ្យម (SMEs) និងសិប្បកម្មផ្នែកកម្មន្តសាល ដែលបានចុះបញ្ជីក្នុងឆ្នាំ២០២៤ មានចំនួន ១ ២៩២មូលដ្ឋាន ក្នុងនោះការចុះបញ្ជីថ្នាក់កណ្តាលមានចំនួន ១៧មូលដ្ឋាន, ការចុះបញ្ជីអាជីវកម្មដោយផ្ទាល់តាមបច្ចេកវិទ្យាព័ត៌មានចំនួន ៣៣៨មូលដ្ឋាន, តាមបណ្តាមន្ទីររាជធានី-ខេត្តមានចំនួន ៨៣១មូលដ្ឋាន និងចុះបញ្ជីនៅតាមរាជធានី-ខេត្ត/ក្រុង ស្រុក/ខណ្ឌ ចំនួន ១០៦មូលដ្ឋាន។

ចំពោះ SMEs និងសិប្បកម្មផ្នែកកម្មន្តសាល ដែលចេញវិញ្ញាបនបត្រដំណើរការមានចំនួន ១ ០៥២មូលដ្ឋាន និងវិញ្ញាបនបត្របន្តចំនួន ១ ៣៣៨មូលដ្ឋាន ដែលបង្កើតបានការងារថ្មីចំនួន ២៥ ៨៣៣នាក់។ ទន្ទឹមនឹងនេះ ក៏មានសហគ្រាសធុនតូច និងមធ្យម និងសិប្បកម្ម បានបិទចំនួន ១ ៩៥០មូលដ្ឋាន នៅក្នុងឆ្នាំ២០២៤ ដែលធ្វើឱ្យពលករថយចុះចំនួន ១៣ ៥៧៦នាក់។

តាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបង្ហាញថា គិតត្រឹមដំណាច់ឆ្នាំ២០២៤ សហគ្រាសធុនតូច និងមធ្យម និងសិប្បកម្ម សរុបមានចំនួន ៤៣ ៩៧០មូលដ្ឋាន ក្នុងនោះមានសហគ្រិនស្ត្រីចំនួន ៨ ៣២៥មូលដ្ឋាន និងពលករចំនួន ៤៧៦ ២២៣នាក់ ខណៈដែលមានពលករស្ត្រីចំនួន ១៤៤ ៥៥៩នាក់៕