ភ្នំពេញ៖ សម្ដេចធិបតី ហ៊ុន ម៉ាណែត បានលើកឡើងក្នុងពិធីសម្ពោធដាក់ឱ្យដំណើរការ «ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ» ថា អ្នកប្រកបរបរសេដ្ឋកិច្ចក្រៅប្រព័ន្ធទាំងអស់ ដែលមានផលរបរ ឬចំណូលក្រោម ២៥០លានរៀលក្នុងមួយឆ្នាំ គឺមិនមានកាតព្វកិច្ចពន្ធ, មិនចាំបាច់បង់ពន្ធប៉ាតង់ និងមិនចាំបាច់រៀបចំឯកសារប្រកាសពន្ធឡើយ។

ក្នុងកម្មវិធីសម្ពោធ នាថ្ងៃទី១៦ ខែធ្នូ ឆ្នាំ២០២៤ នេះ សម្ដេចធិបតី ហ៊ុន ម៉ាណែត បានបញ្ជាក់ថា អ្នកសេដ្ឋកិច្ចក្រៅប្រព័ន្ធ ដូចជាសេដ្ឋកិច្ចក្នុងប្រព័ន្ធទ្រង់ទ្រាយតូចមីក្រូ ដែលមានផលរបរក្រោម ២៥០លានរៀល ឬប្រហែល ៦ម៉ឺនដុល្លារ ក្នុងមួយឆ្នាំ គឺមិនត្រូវឱ្យបង់ពន្ធទេ។

សម្តេចធិបតីនាយករដ្ឋមន្ត្រី បានបន្តថា ការមិនតម្រូវឱ្យបង់ពន្ធសម្រាប់អ្នកសេដ្ឋកិច្ចក្រៅប្រព័ន្ធដែលមានចំណូលក្រោម២៥០លានរៀលនេះ គឺជាការគិតគូរបស់រាជរដ្ឋាភិបាលចំពោះសុខទុក្ខអ្នកសេដ្ឋកិច្ចក្រៅប្រព័ន្ធ និងដើម្បីធានាថា គ្មានការចំណាយមិនចាំបាច់ណាមួយដែលអ្នកសេដ្ឋកិច្ចក្រៅប្រព័ន្ធត្រូវបង់ចូលរដ្ឋឡើយ។ សម្ដេចធិបតី ហ៊ុន ម៉ាណែត បន្ថែមថា គោលការណ៍នេះ គឺបានប្រកាសម្ដងរួចមកហើយកាលពីខួប១ឆ្នាំ នៃរាជរដ្ឋាភិបាល៕