ភ្នំពេញ៖ លោក Deng Minghui ប្រធានក្រុមហ៊ុន Shinto Holdings Inc., បង្ហាញពីចំណាប់អារម្មណ៍ស្វែងរកឱកាសវិនិយោគលើវិស័យបរិស្ថាន ផ្តោតលើការកែច្នៃសំណល់ និងបញ្ញាសិប្បនិម្មិត (AI) នៅកម្ពុជា។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី២៩ ខែឧសភា ឆ្នាំ២០២៥។

ក្នុងកិច្ចពិភាក្សាការងារកាលពីថ្ងៃទី២៩ ខែឧសភា ឆ្នាំ២០២៥ ជាមួយសម្តេចធិបតី ហ៊ុន ម៉ាណែត លោក Deng Minghui ក៏បានលើកឡើងពីប្រតិបត្តិការអាជីវកម្មរបស់ក្រុមហ៊ុន ដែលមានបទពិសោធជាច្រើនឆ្នាំលើវិស័យបរិស្ថាន ជាពិសេសការគ្រប់គ្រងសំណល់ និងបញ្ញាសិប្បនិម្មិត (AI)។ ជាមួយគ្នានេះ ក្រុមហ៊ុន បានចុះបញ្ជីក្នុងផ្សារហ៊ុន និងកំពុងមានប្រតិបត្តិការអាជីវកម្មជាច្រើនពាក់ព័ន្ធនឹងវិស័យបរិស្ថាននៅក្នុងប្រទេសជប៉ុន ផងដែរ។

ចំពោះការវិនិយោគវិញ សម្តេចធិបតី ហ៊ុន ម៉ាណែត បានលើកទឹកចិត្តឱ្យក្រុមហ៊ុនបន្តផ្សារភ្ជាប់ទំនាក់ទំនង និងសហការជាមួយដៃគូវិនិយោគក្នុងស្រុក ដើម្បីចាប់ឱកាសវិនិយោគជាក់ស្តែងលើវិស័យនេះ។ សម្តេចធិបតី ហ៊ុន ម៉ាណែត បានលើកឡើងថាកម្ពុជាមានគោលនយោបាយបើកចំហ និងស្វាគមន៍ការវិនិយោគពីគ្រប់បណ្តាប្រទេសលើពិភពលោក ដោយរាជរដ្ឋាភិបាលកម្ពុជាក៏បានដាក់ចេញនូវគោលនយោបាយលើកទឹកចិត្តដល់វិស័យអាទិភាពផងដែរ។

សម្ដេចធិបតី ហ៊ុន ម៉ាណែត ក៏បានលើកឡើងថា ស្របពេលដែលកំណើនប្រជាជនបន្តកើនឡើង និងការរីកលូតលាស់នៃនគរូបនីយកម្មនៅតាមទីក្រុង-ប្រជុំជននេះ រាជរដ្ឋាភិបាល កំពុងផ្តោតអាទិភាពលើការវិនិយោគដែលគាំទ្រដល់កិច្ចការពារបរិស្ថាន ដែលរួមមានការកែច្នៃសំណល់ និងការធ្វើប្រព្រឹត្តកម្មទឹកកខ្វក់ជាដើម៕