ភ្នំពេញ៖ ឯកឧត្តម ឃួន ផុនរតនៈ រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ និងឯកឧត្តម Danny Annan ឯកអគ្គរាជទូតវិសាមញ្ញ និងពេញសមត្ថភាព នៃដាណឺម៉ាក ប្រចាំកម្ពុជា ប្តេជ្ញាចិត្តរួមគ្នាជំរុញកិច្ចសហប្រតិបត្តិការបន្ថែមទៀត លើវិស័យនានា ពិសេសវិស័យទេសចរណ៍ ពាណិជ្ជកម្ម និងវិនិយោគ។

ដើម្បីជាផលប្រយោជន៍ទៅវិញទៅមកសម្រាប់ប្រជាជាតិទាំងពីរ ឯកឧត្តម ឃួន ផុនរតនៈ រដ្ឋលេខាធិការ និងឯកឧត្តម Danny Annan ក៏បានផ្លាស់ប្តូរទស្សនៈលើបញ្ហាតំបន់ និងអន្តរជាតិដែលជាប្រយោជន៍ និងកង្វល់រួមផងដែរ។ ក្នុងជំនួប ក្រសួងការបរទេស កាលពីថ្ងៃ២៦ ខែកុម្ភៈ ឆ្នាំ២០២៥ ភាគីទាំងពីរ ក៏បានសម្តែងនូវការពេញចិត្តចំពោះទំនាក់ទំនងប្រកបដោយផ្លែផ្កា និងយូរអង្វែងរវាងកម្ពុជា និងដាណឺម៉ាក ពិសេសវឌ្ឍនភាពនៃចំណងមិត្តភាព និងកិច្ចសហប្រតិបត្តិការនានា ទាំងក្របខ័ណ្ឌទ្វេភាគី និងពហុភាគី៕