ភ្នំពេញ៖ ក្រសួងពាណិជ្ជកម្ម នឹងរៀបចំ «ពិព័រណ៍ផលិតផលខ្មែរ និងបន្លែផ្លែឈើ លើកទី១៨» នៅបរិវេណសួនហាត់ប្រាណមាត់ស្ទឹងសៀមរាប ដើម្បីផ្សព្វផ្សាយផលិតផល និងផ្តល់ឱកាសឱ្យសហគ្រិនធ្វើអាជីវកម្មថ្មី ព្រមទាំងបង្កើតកិច្ចសហការពាណិជ្ជកម្ម សម្រាប់កសិករ អាជីវករ និងសហគ្រិន។ នេះបើយោងតាមការចុះផ្សាយរបស់ ក្រសួងពាណិជ្ជកម្ម។

ពាក់ព័ន្ធនឹងពិព័រណ៍ ដែលរៀបចំចាប់ពីថ្ងៃទី២៧ ខែកុម្ភៈ ដល់ថ្ងៃទី២ ខែមីនា ឆ្នាំ២០២៥ ក្រោមមូលបទ «បង្កើនតម្លៃបន្ថែមនៃអាជីវកម្មបន្លែផ្លែឈើ» នេះ ក្រសួងពាណិជ្ជកម្ម បានលើកទឹកចិត្តឱ្យអាជីវករ ផលិតករ អ្នកផ្គត់ផ្គង់ អ្នកកែច្នៃ សហគមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ និងប្រជាពលរដ្ឋ ដែលរស់នៅសៀមរាប ចូលរួមទស្សនាឱ្យបានច្រើនកុះករ ដើម្បីស្វែងរកឱកាសបង្កើតដៃគូពាណិជ្ជកម្មរវាងសហគមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ ជាមួយនឹងអ្នកចែកចាយ អ្នកលក់ដុំ-រាយ អ្នកកែច្នៃ និងម្ចាស់អាជីវកម្មនានា៕