ភ្នំពេញ៖ ឯកឧត្តម ង្វៀន ម៉ិញវូ ឯកអគ្គរដ្ឋទូតវៀតណាមប្រចាំកម្ពុជា ប្ដេជ្ញាចិត្តប្រឹងប្រែងជំរុញការពង្រឹង និងពង្រីកកិច្ចសហប្រតិបត្តិការជាមួយកម្ពុជា លើវិស័យជាច្រើន រួមមានសេដ្ឋកិច្ច ពាណិជ្ជកម្ម និងការវិនិយោគ ការពារជាតិនិងសន្តិសុខ ទេសចរណ៍ អប់រំ ការបណ្ដុះបណ្ដាលធនធានមនុស្ស ការតភ្ជាប់ហេដ្ឋារចនាសម្ព័ន្ធ និងការតភ្ជាប់រវាងប្រជាជននិងប្រជាជន។

ក្នុងជំនួប កាលពីថ្ងៃទី១៩ ខែកុម្ភៈ ឆ្នាំ២០២៥ សម្ដេចធិបតី ហ៊ុន ម៉ាណែត អបអរចំពោះ ឯកឧត្តម ង្វៀន ម៉ិញវូ (Nguyen Minh Vu) ដែលត្រូវបានតែងតាំងជា ឯកអគ្គរដ្ឋទូតវៀតណាមប្រចាំកម្ពុជា។ ទន្ទឹមនឹងនេះ សម្ដេចធិបតីនាយករដ្ឋមន្រ្តី ក៏បានវាយតម្លៃចំពោះទំនាក់ទំនងជាអ្នកជិតខាងល្អ កិច្ចសហប្រតិបត្តិការប្រកបដោយផ្លែផ្កាលើគ្រប់វិស័យរវាងប្រទេសទាំងពីរផងដែរ។

សម្ដេចធិបតីនាយករដ្ឋមន្រ្តី ក៏បានវាយតម្លៃខ្ពស់ចំពោះការប្ដេជ្ញាចិត្តរបស់ ឯកឧត្តមឯកអគ្គរដ្ឋទូត ក្នុងការជំរុញទំនាក់ទំនង និងកិច្ចសហប្រតិបត្តិការនៃប្រទេសទាំងពីរ ឱ្យកាន់តែខ្លាំងបន្ថែមទៀត និងបានលើកទឹកចិត្តឯកឧត្តមឱ្យសហការជិតស្និទ្ធជាមួយក្រសួង-ស្ថានប័នពាក់ព័ន្ធកម្ពុជា ផងដែរ។ នេះបើតាមការចុះផ្សាយរបស់ សម្ដេចធិបតី ហ៊ុន ម៉ាណែត កាលពីថ្ងៃទី២០ ខែកុម្ភៈ ឆ្នា២០២៥៕