ភ្នំពេញ៖ ក្រុមហ៊ុនចិនចំនួន១៨ មកពីទីក្រុងនីងប៉ ខេត្តចឺជាំង ដែលមានអាជីវកម្មក្នុងវិស័យមួយចំនួន ដូចជាការកែច្នៃកៅស៊ូ ផលិតសម្ភារបរិក្ខារពេទ្យ សម្ភារឆ្លាតវៃប្រើប្រាស់ក្នុងផ្ទះ សម្លៀកបំពាក់ និងធនាគារ មកស្វែងរកលទ្ធភាពបណ្តាក់ទុនកម្ពុជា នាថ្ងៃទី១៧ ខែកុម្ភៈ ឆ្នាំ២០២៥។

ក្នុងជំនួបជាមួយក្រុមហ៊ុន១៨ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានប្រាប់ពីសក្តានុពលក្នុងវិស័យឧស្សាហកម្ម, កម្មន្តសាល, ការកែច្នៃផលិតផល, ការបង្កើតតំបន់សេដ្ឋកិច្ចពិសេស និងវិស័យកសិកម្ម និងកសិ-ឧស្សាហកម្ម ពិសេសកម្ពុជា មានដំណាំយុទ្ធសាស្ត្រជាច្រើន រួមមានស្រូវ ដំទ្បូងមី និងស្វាយចន្ទីជាដើម ដែលទាមទារឱ្យមានការវិនិយោគកែច្នៃក្នុងស្រុក ដើម្បីបង្កើតតម្លៃបន្ថែម។ ឯកឧត្តម ជា វុទ្ធី ក៏បានជំរុញឱ្យវិនិយោគិន គិតគូរបង្កើតខ្សែចង្វាក់ផលិតកម្មក្នុងវិស័យកសិកម្ម ជាពិសេសការកែច្នៃស្វាយចន្ទី ដែលជាគំនិតផ្តួចផ្តើមរបស់ សម្តេចធិបតី ហ៊ុន ម៉ាណែត។

លោកស្រី លូ ចឺឈីង (Lu Zhiqiong) អគ្គនាយកធនាគារនីងប៉ ជឿជាក់ថា ជំនួបលើកនេះ នឹងធ្វើឱ្យក្រុមហ៊ុនចិនទាំង១៨ មានចំណាប់អារម្មណ៍កាន់តែខ្លាំង ក្នុងការគិតគូរមកបណ្តាក់ទុនវិនិយោគនៅកម្ពុជា៕