ភ្នំពេញ៖ ក្រុមប្រឹក្សាធុរកិច្ចស្ត្រីហ្វីលីពីន ចង់វិនិយោគលើវិស័យសំខាន់ៗជាច្រើននៅកម្ពុជា រួមមាន៖ វិស័យកសិកម្ម ផ្តោតលើឧស្សាហកម្មស្រូវអង្ករ, អាកាសចរណ៍, ទេសចរណ៍, យានយន្ត, អប់រំ, សុខាភិបាល, ដឹកជញ្ជូន និងឡូជីស្ទីក, អាជីវកម្មលក់រាយ និងកម្មន្ដសាល។ នេះជាការលើកឡើងរបស់លោកស្រី Rosemarie P. Rafael ប្រធានក្រុមប្រឹក្សាធុរកិច្ចស្ត្រីហ្វីលីពីន នាថ្ងៃទី២២ ខែមករា ឆ្នាំ២០២៥។

ក្នុងជំនួបពិភាក្សាជាមួយសម្ដេចធិបតី ហ៊ុន ម៉ាណែត លោកស្រី Rosemarie P. Rafael បានបន្តថា ដំណើរទស្សនកិច្ចមកកម្ពុជានាពេលនេះ ក៏ដើម្បីស្វែងរកកិច្ចសហការជាមួយសហគ្រិនជាស្ត្រីនៅកម្ពុជា ពាក់ព័ន្ធនឹងការពង្រឹងជំនាញវិជ្ជាជីវៈ, ការផ្លាស់ប្ដូរបទពិសោធ និងឧត្តមានុវត្តន៍ល្អៗលើការកសាងសមត្ថភាពជាដើម។

ក្នុងកិច្ចពិភាក្សានេះដដែល សម្តេចធិបតី ហ៊ុន ម៉ាណែត បានលើកឡើងថា កម្ពុជា ស្វាគមន៍ជានិច្ចចំពោះចំណាប់អារម្មណ៍របស់ក្រុមប្រឹក្សាធុរកិច្ចក្នុងការស្វែករកឱកាសវិនិយោគ និងពាណិជ្ជកម្មនៅកម្ពុជា។ សម្តេចធិបតី ហ៊ុន ម៉ាណែត បានបន្តថា វេទិកាធុរកិច្ច កម្ពុជា-ហ្វីលីពីន នឹងជួយតភ្ជាប់ទំនាក់ទំនងរវាងធុរជន ឬវិនិយោគិននៃប្រទេសទាំងពីរ និងជួយបង្កើតកាលានុវត្តភាពបន្ថែមសម្រាប់ការវិនិយោគជាដើម៕