ភ្នំពេញ៖ កុងស៊ុលកិត្តិយសកម្ពុជា ប្រចាំទីក្រុង Bangalore នៃប្រទេសឥណ្ឌា លោក Karthik Tallam បានស្នើសុំចុះអនុស្សរណៈនៃការយោគយល់គ្នា (MoU) រវាងមន្ទីរទេសចរណ៍ខេត្តសៀមរាប និងមន្ទីរទេសចរណ៍រដ្ឋ Karnataka របស់ឥណ្ឌា នាពេលខាងមុខ ដើម្បីពង្រឹងកិច្ចសហប្រតិបត្តិការ និងចូលរួមអភិវឌ្ឍន៍វិស័យទេសចរណ៍ប្រទេសទាំងពីរ។

ក្នុងជំនួបជាមួយ លោក Karthik Tallam កាលពីថ្ងៃទី៣ ខែមីនា ឆ្នាំ២០២៥ លោក ង៉ូវ សេងកាក់ អភិបាលរងខេត្តសៀមរាប បានអរគុណ និងគាំទ្រចំពោះគម្រោងស្នើសុំចុះអនុស្សរណៈនៃការយោគយល់គ្នា រវាងមន្ទីរទេសចរណ៍នៃប្រទេសទាំងពីរ ដើម្បីរួមគ្នាពង្រឹងកិច្ចសហប្រតិបត្តិការទ្វេភាគី ក៏ដូចជាជំរុញគាំទ្រការអភិវឌ្ឍវិស័យទេសចរណ៍ ពិសេសខេត្តសៀមរាបឱ្យកាន់តែរីកចម្រើន។ នេះបើតាមការចុះផ្សាយរបស់ រដ្ឋបាលខេត្តសៀមរាប៕