ភ្នំពេញ៖ ក្រុមការងារបច្ចេកទេសរបស់ធនាគារពិភពលោក ប្រចាំកម្ពុជា និងក្រសួងពាណិជ្ជកម្ម ពិភាក្សាពីគម្រោង Cambodia Regional Connectivity Improvement Project ផ្នែកកិច្ចសម្រួលពាណិជ្ជកម្ម ដើម្បីធ្វើឱ្យប្រសើរឡើងវិស័យភស្តុភារកម្ម និងដឹកជញ្ជូននៅកម្ពុជា។

គម្រោងខាងលើ ក៏មានគោលបំណងការពង្រឹងទំនាក់ទំនងក្នុងតំបន់ស្របតាមការប្រែប្រួលអាកាសធាតុប្រកបដោយបរិយាបន្ន័ និងការគ្រប់គ្រងគម្រោង និងការបណ្តុះបណ្តាលធនធានមនុស្ស សំដៅធ្វើឱ្យប្រសិទ្ធិភាពនៃការដឹកជញ្ជូននិងការតភ្ជាប់ក្នុងតំបន់ លើកកម្ពស់កិច្ចសម្រួលពាណិជ្ជកម្មកាន់តែមានប្រសិទ្ធភាពខ្ពស់ ស្របតាមការប្រែប្រួលអាកាសធាតុប្រកបដោយបរិយាប័ន្ន។

ជំនួបដែលធ្វើឡើង កាលពីទី១៣ ខែកុម្ភៈ ឆ្នាំ២០២៥ នេះ មានការចូលរួមពី លោកជំទាវ ស្វាយ ណាគ្រី អនុរដ្ឋលេខាធិការក្រសួងពាណិជ្ជកម្ម អមដោយលោក ថុល ណារ៉ា អគ្គនាយករងពាណិជ្ជកម្មអន្តរជាតិ និងក្រុមការងារបច្ចេកទេសរបស់ធនាគារពិភពលោក ដឹកនាំដោយលោក Sadig Aliyev ប្រធានអ្នកជំនាញការផ្នែកដឹកជញ្ជូននិងហេដ្ឋារចនាសម្ព័ន្ធប្រចាំនៅប្រទេសសឹង្ហបូរី, តំណាងក្រសួងសេដ្ឋកិច្ចនិងហិរញ្ញវត្ថុ ក្រសួងសាធារណៈការនិងដឹកជញ្ជូន និងអគ្គនាយកដ្ឋានគយនិងរដ្ឋាករកម្ពុជា៕