ភ្នំពេញ៖ សារមន្ទីរសេដ្ឋកិច្ច និងរូបិយវត្ថុព្រះស្រីឦសានរវ្ម័ន (ស.ស.រ) ទទួលបានពានរង្វាន់ Tripadvisor Travelers' Choice Award 2024 ដែលជាពានរង្វាន់បង្ហាញអំពីការចាប់អារម្មណ៍ តាមរយៈការចូលទស្សនា និងវាយតម្លៃខ្ពស់ពីភ្ញៀវទេសចរ ក្នុងរយៈពេល១២ខែពេញ។

តាមការចុះផ្សាយរបស់ សារព្រះស្រីឦសានរវ្ម័ន ពានរង្វាន់ Travelers' Choice Award នេះ គឺជាការឈ្នះចំណាត់ថ្នាក់ក្នុងចំណោម១០% នៃតារាងចំណាត់ថ្នាក់ខ្ពស់បំផុតទូទាំងពិភពលោក នៅលើ Tripadvisor។ ការទទួលបានពានរង្វាន់នេះ គឺផ្អែកលើគុណភាព នៃមតិឆ្លើយតបរបស់ភ្ញៀវទេសចរ ដែលចូលទស្សនា។ ជាមួយគ្នានេះសារមន្ទីរ ស.ស.រ បានថ្លែងអរគុណចំពោះភ្ញៀវដែលបានមកទស្សនា ការចែករំលែកបទពិសោធន៍ និងការគាំទ្រផងដែរ៕