ភ្នំពេញ៖ សាជីវកម្ម San Miguel ឈានមុខមួយ ក្នុងវិស័យហេដ្ឋារចនាសម្ព័ន្ធរូបវន្ត អាហារ និងភេសជ្ជៈ ថាមពល និងចម្រាញ់ប្រេងនៅហ្វីលីពីន ចាប់អារម្មណ៍បណ្ដាក់ទុនវិនិយោគលើវិស័យហេដ្ឋារចនាសម្ព័ន្ធធំៗនៅកម្ពុជា តាមរយៈការពង្រីកកិច្ចសហការឱ្យកាន់តែច្រើនជាមួយក្រុមហ៊ុននៅកម្ពុជា។ នេះជាការលើកឡើងរបស់ លោក Ramon S. Ang ប្រធាន និងជានាយកប្រតិបត្តិនៃសាជីវកម្ម San Miguel។

ទាក់ទងនឹងគោលបំណងដាក់ទុនវិនិយោគនៅកម្ពុជានេះ លោក Ramon S. Ang បានបញ្ជាក់ថា កម្ពុជា ជាប្រទេសមានគុណសម្បត្តិប្រកួតប្រជែងខ្ពស់ ដែលមានដីមានជីជាតិល្អ, កម្លាំងពលកម្មមានជំនាញ, ភូមិសាស្ត្រអំណោយផល ដែលអាចឱ្យកម្ពុជាតភ្ជាប់ខ្លួនទៅកាន់បណ្ដាប្រទេសនៅក្នុងតំបន់ និងសកលលោកបានយ៉ាងល្អ។ សម្ដេចធិបតី ហ៊ុន ម៉ាណែត បានលើកឡើងពីសក្ដានុពល ឱកាសវិនិយោគលើគម្រោងហេដ្ឋារចនាសម្ព័ន្ធធំៗ ដូចជាផ្លូវល្បឿនលឿនដែលតភ្ជាប់នៅក្នុងកម្ពុជា ក៏ដូចទៅក្នុងបណ្ដាប្រទេសក្នុងតំបន់ និងអំពីវិស័យគន្លឹះ និងយុទ្ធសាស្ត្ររបស់កម្ពុជា ដែលជាកាលានុវត្តភាពសម្រាប់ការវិនិយោគរបស់ក្រុមហ៊ុនផងដែរ។

សម្ដេចធិបតីនាយករដ្ឋមន្រ្តី សង្កត់ធ្ងន់ថា វិស័យសិកម្ម ជាវិស័យយុទ្ធសាស្ត្ររបស់កម្ពុជា ហើយក្រុមហ៊ុនគួរយកចិត្តទុកដាក់ និងពិនិត្យមើលឱកាសវិនិយោគក្នុងដំណាក់កាលណាមួយ នៅក្នុងខ្សែច្រវាក់ផ្គត់ផ្គង់ ភ្ជាប់ទៅកាន់តំបន់ និងពិភពកលោក។ សម្ដេចបវរធិបតីនាយករដ្ឋមន្រ្តី បន្ថែមទៀតថា រាជរដ្ឋាភិបាលកម្ពុជា គាំទ្រ និងបង្កលក្ខណៈងាយស្រួល ក៏ដូចជាបង្កើតបរិយាកាសអំណោយផល និងកិច្ចសម្របសម្រួលនានា សំដៅជំរុញការវិនិយោគ និងភាពជោគជ័យរបស់ក្រុមហ៊ុននៅកម្ពុជា៕