ភ្នំពេញ៖ «តំបន់សេដ្ឋកិច្ចពិសេស» គឺជាតំបន់ស្ថិតនៅទីតាំងមានសក្តានុពល និងហេដ្ឋារចនាសម្ព័ន្ធ ដែលផ្តល់ភាពងាយស្រួលដល់គ្រប់សកម្មភាពវិនិយោគ និងសមស្របជួយឱ្យការធ្វើធុរកិច្ចរបស់វិនិយោគិនទទួលបានភាពរីកចម្រើន និងជោគជ័យ។

បច្ចុប្បន្ន មានឧស្សាហកម្មគ្រឿងសង្ហារឹម ឈើ Veneer ផលិតផលធ្វើពីឈើឧស្សាហកម្មយានយន្ត និងគ្រឿងអេឡិចត្រូនិក និងឧស្សាហកម្មធុនធ្ងន់ និងរោងចក្រផលិតសំបកកង់យានយន្ត ដែលមានទីតាំងនៅក្នុងតំបន់សេដ្ឋកិច្ចពិសេស។ ជាមួយគ្នានេះ ការនាំចេញផលិតផលពីតំបន់សេដ្ឋកិច្ចពិសេសទៅកាន់ទីផ្សារអន្តរជាតិ មានការកើនឡើងគួរឱ្យកត់សម្គាល់ផងដែរ។

គួរបញ្ជាក់ថា រយៈពេលជិត ២០ឆ្នាំកន្លងមកនេះ តំបន់សេដ្ឋកិច្ចពិសេសបានរួមចំណែកសំខាន់ក្នុងការធ្វើពិពិធកម្មឧស្សាហកម្ម និងប្រភពទុនវិនិយោគនៅកម្ពុជា។ នេះបើតាមការឱ្យដឹង ពីក្រុមប្រឹក្សាអភិវឌ្ឍន៍កម្ពុជា៕