ភ្នំពេញ៖ ឯកឧត្តម ម៉ុល វិបុល អនុរដ្ឋលេខាធិការនៃក្រសួងការងារ និងបណ្ដុះបណ្ដាលវិជ្ជាជីវៈ ស្នើដល់រដ្ឋបាលរោងចក្រ និងគ្រប់ភាគីពាក់ព័ន្ធទាំងអស់ចូលរួមសហការគាំទ្រកម្មវិធី ១,៥លាននាក់ និងផ្សព្វផ្សាយជំរុញលើកទឹកចិត្តទៅដល់ក្រុមគោលដៅនៅតាមភូមិ/ឃុំ/ស្រុកកំណើត។ នេះបើតាមការចុះផ្សាយរបស់ក្រសួងការងារ នាថ្ងៃទី៣០ ខែមករា ឆ្នាំ២០២៥។

ជាមួយគ្នានេះ ឯកឧត្តម ម៉ុល វិបុល ក៏បានលើកឡើងអំពីកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥លាននាក់, អត្ថប្រយោជន៍ទទួលបានពីបេឡាជាតិសន្តិសុខសង្គម (ប.ស.ស.) និងការផ្សព្វផ្សាយអំពីឱកាសការងារជាង ៦ម៉ឺនកន្លែងរបស់ទីភ្នាក់ងារជាតិមុខរបរ និងការងារ (NEA) ទៅដល់កម្មករនិយោជិតនៃរោងចក្រ SUN SHUI SHING INDUSTRIAL (CAMBODIA) CO LTD នៅខេត្តកំពង់ស្ពឺផងដែរ។

លើសពីនេះ ឯកឧត្តមអនុរដ្ឋលេខាធិការនៃក្រសួងការងារ ក៏បានស្នើឱ្យកម្មករនិយោជិតជួយបន្តចែករំលែកព័ត៌មានឱ្យបានទូលំទូលាយដល់កម្មករផ្សេងទៀតអំពីឱកាសការងារជាង ៦ម៉ឺនកន្លែងរបស់ទីភ្នាក់ងារជាតិមុខរបរ និងការងារទៀតផង៕