ភ្នំពេញ៖ ធនាគារជាតិនៃកម្ពុជា បានសហការជាមួយធនាគារ ភ្នំពេញ ពាណិជ្ជ ម.ក PPCBank និង ធនាគារ Jeonbuk សម្ពោធដាក់ឱ្យដំណើរការជាផ្លូវការគម្រោងទូទាត់ឆ្លងដែនតាមឃ្យូអរកូត (QR Code) ដំណាក់កាលទី១ រវាងសាធារណរដ្ឋកូរ៉េ និងកម្ពុជា កាលពីថ្ងៃទី២៩ ខែសីហា ឆ្នាំ២០២៤។ ធនាគារជាតិ បានឱ្យដឹងថាគម្រោងមួយនេះ នឹងរួមចំណែកជំរុញសកម្មភាពពាណិជ្ជកម្ម និងទេសចរណ៍ រវាងប្រទេសទាំងពីរផងដែរ។

តាមការចុះផ្សាយរបស់ធនាគារជាតិ ដំណើរការគម្រោងទូទាត់ឆ្លងដែនតាមឃ្យូអរកូតកម្ពុជា-កូរ៉េ នឹងរួមចំណែកយ៉ាងសំខាន់ក្នុងការលើកកម្ពស់កិច្ចសហប្រតិបត្តិការផ្នែកហិរញ្ញវត្ថុរបស់ប្រទេសទាំងពីរឱ្យខ្ពស់ថែមមួយកម្រិតទៀត ព្រមទាំងលើកកម្ពស់បរិយាបន្នហិរញ្ញវត្ថុនៅកម្ពុជា។ តាមរយៈគម្រោងដំណាក់កាលទី១នេះ ភ្ញៀវអន្តរជាតិពីប្រទេសកូរ៉េដែលមកកម្សាន្តនៅកម្ពុជា នឹងអាចប្រើប្រាស់កម្មវិធីធនាគារតាមទូរសព្ទ(JBB Mobile App) របស់ធនាគារ Jeonbuk ដើម្បីស្កេនទូទាត់នៅតាមហាងទំនិញដែលមានស្លាកសញ្ញា ខេអេចឃ្យូអរកូត គណនីប្រាក់រៀល។

គួរបញ្ជាក់ថា កម្មវិធីសម្ពោធដាក់ឱ្យដំណើរការជាផ្លូវការគម្រោងទូទាត់ឆ្លងដែនតាមឃ្យូអរកូត (QR Code) ដំណាក់កាលទី១ រវាងកូរ៉េ និងកម្ពុជា បានប្រព្រឹត្តឡើងក្រោមអធិបតីភាព លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា៕