ភ្នំពេញ៖ ក្រសួងពាណិជ្ជកម្ម នឹងរៀបចំបង្កើតគណៈកម្មការតម្រង់ទិសគម្រោងកិច្ចសហប្រតិបត្តិការ រវាងសហភាពអឺរ៉ុប និងអាល្លឺម៉ង់ (EU-German GATE) ដើម្បីពិនិត្យ អនុម័តផែនការសកម្មភាព និងផ្ដល់អនុសាសន៍សម្រាប់ដោះស្រាយបញ្ហានានាអំឡុងពេលអនុវត្តគម្រោង ក្នុងគោលដៅបង្កើនសមត្ថភាពពាណិជ្ជកម្ម។

បើតាមកិច្ចប្រជុំលើកទី១ នៃគណៈកម្មការតម្រង់ទិសសម្រាប់គម្រោង EU-German GATE ការរៀបចំបង្កើតគណៈកម្មការតម្រង់ទិសគម្រោងនេះ គឺដើម្បីសម្រេចឱ្យបានគោលដៅរួមរបស់គម្រោងប្រកបដោយប្រសិទ្ធផល និងមានការចូលរួមយ៉ាងសកម្មពីភាគីពាក់ព័ន្ធ ក្នុងគម្រោងដែលក្រសួងពាណិជ្ជកម្ម កំពុងសហការជាមួយអង្គការ GIZ Cambodia ក្នុងការបង្កើនសមត្ថភាពពាណិជ្ជកម្ម និងការចូលទៅកាន់ទីផ្សារសកលរបស់កម្ពុជា។ គួរបញ្ជាក់ថា គម្រោង EU-German GATE មានសុពលភាពអនុវត្ត ចាប់ពីខែមេសា ឆ្នាំ២០២៤ រហូតដល់ ខែមិថុនា ឆ្នាំ២០២៨៕