ភ្នំពេញ៖ ក្រសួងពាណិជ្ជកម្ម បានផ្តល់អាជ្ញាបណ្ណនាំចេញត្បូងពេជ្រមិនទាន់កែច្នៃ និងសល់ពីការកែច្នៃចំនួន៣៤ ដែលគិតជាទឹកប្រាក់ ២៩,៣៦លានដុល្លារ ថយចុះ១៨,៧៥% នៅក្នុងរយៈពេល ១១ខែ នៃឆ្នាំ២០២៤។ បើតាមក្រសួងពាណិជ្ជកម្ម ការផ្តល់អាជ្ញាបណ្ណនាំចូលត្បូងពេជ្រមិនទាន់កែច្នៃ និងសល់ពីការកែច្នៃចំនួន ១១អាជ្ញាបណ្ណ គឺមានទឹកប្រាក់ ៣៦,២៨លានដុល្លារ ដែលថយចុះ ៤៥%។

យោងតាមរបាយការណ៍បូកសរុបលទ្ធផលការងារពាណិជ្ជកម្មឆ្នាំ២០២៤ និងទិសដៅពាណិជ្ជកម្មឆ្នាំ២០២៥ រយៈពេល១១ខែ ក្នុងឆ្នាំ២០២៣ ក្រសួងពាណិជ្ជកម្ម បានផ្តល់អាជ្ញាបណ្ណនាំចេញត្បូងពេជ្រមិនទាន់កែច្នៃនិងសល់ពីការកែច្នៃចំនួន៤៥ សម្រេចបានទឹកប្រាក់ ៦៩,៤៣លានដុល្លារ និងមានការនាំចូលចំនួន ២០អាជ្ញាបណ្ណ សម្រេចបានទឹកប្រាក់ចំនួន ៣៦,១៣លានដុល្លារ។

គួរបញ្ជាក់ថា ទំហំពាណិជ្ជកម្មកម្ពុជា សម្រេចបានទឹកប្រាក់ចំនួន ៥០,៤៥ប៊ីលានដុល្លារ កើនឡើង១៥,៩៥% ដែលក្នុងនោះការនាំចេញសម្រេចបានទឹកប្រាក់ចំនួន ២៤,៣៤ប៊ីលានដុល្លារ កើនឡើង១៤,៣៦% និងការនាំចូលសម្រេចបានទឹកប្រាក់២៦,១០ប៊ីលានដុល្លារ មានការកើនឡើង ១៧,៤៨%៕