ភ្នំពេញ៖ ក្រសួងពាណិជ្ជកម្ម និងក្រុមហ៊ុន ភីធីធី (ខេមបូឌា) ឯកភាពលើគម្រោងសកម្មភាពក្នុងការចាប់ផ្តើមអនុវត្តការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី នៅក្នុងខេត្តទាំង១៩។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី១២ ខែមីនា ឆ្នាំ២០២៥។

ក្នុងកិច្ចប្រជុំរវាងលោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម និងតំណាងក្រុមហ៊ុន ភីធីធី (ខេមបូឌា) ធ្វើឡើងក្នុងគោលបំណងជំរុញ និងបង្កើនការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី សម្រាប់ឆ្នាំ២០២៥។ បន្ថែមពីនោះ លោកជំទាវ តោ ពិឡា ក៏បានលើកទឹកចិត្តដល់មន្ទីរពាណិជ្ជកម្មរាជធានី-ខេត្តទាំងអស់ ឱ្យខិតខំក្នុងការផ្សព្វផ្សាយ និងកៀរគរអាជីវករឱ្យចូលរួមក្នុងការអនុវត្តគម្រោងនេះដើម្បីឱ្យទទួលបានជោគជ័យតាមការរំពឹងទុក។

ក្នុងឱកាសនោះ តំណាងក្រុមហ៊ុន ភីធីធី (ខេមបូឌា) ក៏បានរាយការណ៍អំពីវឌ្ឍនភាពការងារមួយចំនួនផងដែរ រួមមាន ការត្រៀមរៀបចំតម្លើងស្តង់នៅតាមបណ្តាស្ថានីយរាជធានី-ខេត្តទាំង១៩ និងការរៀបចំមាតិកាសម្រាប់ផ្សព្វផ្សាយលើបណ្តាញសង្គមរបស់ខ្លួនផងដែរ៕