ភ្នំពេញ៖ ក្រសួងពាណិជ្ជកម្ម លើកទឹកចិត្តឱ្យពាណិជ្ជករ និងសាធារណជន ចូលរួមពិព័រណ៍ THAIFEX - Anuga Asia 2025 នៅទីក្រុងបាងកក ប្រទេសថៃ ដើម្បីផ្តល់ឱកាសក្នុងការបង្កើតបណ្តាញអាជីវកម្មនៅក្នុងឧស្សាហកម្មម្ហូបអាហារនិងភេសជ្ជៈ និងវិស័យពាក់ព័ន្ធផ្សេងៗផងដែរ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្ម កាលពីថ្ងៃទី២២ ខែមករា ឆ្នាំ២០២៥។

ពិព័រណ៍ THAIFEX - Anuga Asia 2025 ដែលរៀបចំនៅថ្ងៃទី២៧- ៣១ ខែឧសភា ឆ្នាំ២០២៥នេះ គឺផ្ដោតសំខាន់លើផលិតផលម្ហូបអាហារ និងភេសជ្ជៈ ឧបករណ៍សម្ភារបម្រើដល់ផលិតកម្មក្នុងវិស័យម្ហូបអាហារ សម្ភារប្រើប្រាស់ក្នុងសណ្ឋាគារនិងភោជនីយដ្ឋាន។ ជាមួយគ្នានេះ គណៈកម្មការរៀបចំពិព័រណ៍ នឹងផ្តល់ស្តង់មួយចំនួនជូនក្រសួងពាណិជ្ជកម្មកម្ពុជា ដើម្បីផ្តល់ជូនក្រុមហ៊ុន/សហគ្រាសកម្ពុជា នាំយក ផលិតផលទៅដាក់បង្ហាញ និងស្វែងរកដៃគូពាណិជ្ជកម្មជាលក្ខណៈអន្តរជាតិក្នុងឱកាសព្រឹត្តិការណ៍នេះ។

ចំពោះ ពាណិជ្ជករ និងសាធារណជន ដែលចាប់អារម្មណ៍ចូលរួមក្នុងព្រឹត្តិការណ៍ខាងលើ អាចមកបំពេញបែបបទតាមរយៈនាយកដ្ឋានកិច្ចការពិព័រណ៍ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម យ៉ាងយូរបំផុតត្រឹមថ្ងៃទី២៥ ខែមករា ឆ្នាំ២០២៥។ សម្រាប់ព័ត៌មានបន្ថែម អាចទំនាក់ទំនងតាមរយៈទូរសព្ទលេខ៖ ០១២ ៧៧៧ ៩៥៩ / ០៧៧ ៣៦១ ៨៣៦ ឬអ៊ីម៉ែល [email protected] / [email protected]៕