ភ្នំពេញ៖ ក្រុម Super Junior និងសិល្បៈករ សិល្បៈការនីល្បីៗក្នុងវិស័យ K-POP របស់ប្រទេសកូរ៉េ នឹងចូលរួមសម្តែងនៅកម្ពុជា ក្នុងព្រឹត្តិការណ៍ «ការប្រគំតន្រ្តីសប្បុរសធម៌ចែករំលែកសង្រ្គោះជីវិតសកល» ក្នុងគោលដៅប្រមូលមូលនិធិសប្បុរសធម៌ជួយគាំទ្រដល់មន្ទីរពេទ្យ និងគ្រឹះស្ថានអប់រំនានានៅកម្ពុជា។ នេះបើតាមការចុះផ្សាយរបស់ ក្រសួងទេសចរណ៍ កាលពីថ្ងែទី១៦ ខែមករា ឆ្នាំ២០២៥។

ព្រឹត្តិការណ៍ប្រគំតន្រ្តីសប្បុរសធម៌នេះ នឹងគ្រោងរៀបចំនៅរាជធានីភ្នំពេញ ចន្លោះខែឧសភា-ខែតុលា ឆ្នាំ២០២៥ ដោយមានការចូលរួមពីសិល្បៈករ សិល្បៈការិនីខ្មែរជាច្រើនរូប ដើម្បីបន្តផ្សព្វផ្សាយដល់ ៥ប្រទេស រួមមានប្រទេសកម្ពុជា, កូរ៉េ, ជប៉ុន, ហ្វីលីពីន និងចិន។

ទាក់ទងទៅនឹងការរៀបចំព្រឹត្តិការណ៍ខាងលើ ឯកឧត្តម ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា និងលោក KIM YONG HWAN នាយកមូលនិធិចែករំលែកសង្គ្រោះជីវិតសកល បានជួបជាមួយ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ដើម្បីស្នើសុំឱ្យក្រសួងទេសចរណ៍ជួយសម្របសម្រួល និងពិនិត្យលទ្ធភាពក្នុងការសហការរៀបចំ៕