ភ្នំពេញ៖ កម្ពុជា-អារ៉ាប៊ីសាអ៊ូឌីត ឯកភាពពិនិត្យលទ្ធភាពរៀបចំកម្មវិធីដំណើរទស្សនកិច្ចស្វែងយល់(FAM Trip) ដើម្បីឱ្យផ្នែកឯកជនក្នុងវិស័យទេសចរណ៍នៃភាគីទាំងពីរ ដកស្រង់បទពិសោធ និងរៀបចំជាកញ្ចប់ទស្សនកិច្ចប្រកបដោយគុណភាពខ្ពស់ជូនភ្ញៀវទេសចរ។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី១០ ខែមករា ឆ្នាំ២០២៥។

ក្នុងជំនួបពិភាក្សានេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម ម៉ូហាម៉េដ អ៊ីស្មាអ៊ែល ដាល ឯកអគ្គរាជទូតវិសាមញ្ញ និងពេញសមត្ថភាពនៃអារ៉ាប៊ីសាអ៊ូឌីតប្រចាំកម្ពុជា ក៏បានឯកភាពពង្រឹងកិច្ចសហប្រតិបត្តិការទេសចរណ៍ឱ្យកាន់តែសកម្មបន្ថែមទៀត ដោយពិនិត្យលទ្ធភាពចាត់តាំងក្រុមការងារ ដើម្បីបញ្ចប់សេចក្តីព្រាងអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការទេសចរណ៍។

ជាមួយគ្នានេះ ភាគីទាំងពីរ ក៏បានឯកភាពបង្កើនកិច្ចសហប្រតិបត្តិការលើកិច្ចការទេសចរណ៍មូស្លីម (Muslim Friendly Tourism), ឯកភាពជំរុញការផ្សព្វផ្សាយសក្តានុពលទេសចរណ៍រវាងប្រទេសទាំងពីរឱ្យកាន់តែទូលំទូលាយបន្ថែមទៀត និងបន្តសកម្មភាពមនុស្សធម៌នៅកម្ពុជាបន្ថែមទៀត។ គួរបញ្ជាក់ថា ក្នុងឆ្នាំ២០២៤ កម្ពុជា ទទួលបានភ្ញៀវទេសចរអន្តរជាតិសរុបជាង ៦,៧លាននាក់ កើនឡើង២២,៩% ធៀបនឹងឆ្នាំ២០២៣ ដោយក្នុងនោះមានភ្ញៀវទេសចរអារ៉ាប៊ីសាអ៊ូឌីតមានប្រមាណ ៤០០នាក់៕