ភ្នំពេញ៖ ក្រុមហ៊ុន ADATA Technology Co., Ltd. បង្ហាញបំណងវិនិយោគលើការវិនិយោគបៃតង (Caborn Credit) នៅកម្ពុជា តាមរយៈការបង្កើតរោងចក្ររថយន្តអគ្គិសនី (Electric vehicle) ដែលជាយានជំនិះប្រើដោយម៉ូទ័រអគ្គិសនី និងថ្មជំនួសឱ្យការប្រើម៉ាស៊ីនចំហេះខាងក្នុងដូចជាការប្រើសាំង។ នេះជាការលើកឡើងរបស់លោក ស៊ីម៉ុន ជិន អគ្គនាយកប្រតិបត្តិនៃក្រុមហ៊ុន ADATA Technology កាលពីថ្ងៃទី២ ខែមករា ឆ្នាំ២០២៥។

ក្នុងជំនួបជាមួយឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន លោក ស៊ីម៉ុន ជិន បានបន្តថា រថយន្ត EV គឺជាបច្ចេកវិទ្យាដ៏សំខាន់ក្នុងការកាត់បន្ថយការបំភាយឧស្ម័នពីការដឹកជញ្ជូនតាមផ្លូវគោក ដែលមានចំនួនជាង ១៥%នៃការបំភាយឧស្ម័នដែលទាក់ទងនឹងថាមពលសកល។ ជាមួយគ្នានេះ កាលពីខែកក្កដា ឆ្នាំ២០២៤ ក្រុមហ៊ុន ADATA Technology បានពិភាក្សាជាមួយក្រុមប្រឹក្សាអភិវឌ្ឍន៍កម្ពុជា ដើម្បីពិនិត្យលទ្ធភាពនៃការវិនិយោគនៅកម្ពុជា ដែលក្នុងនោះក្រុមហ៊ុនមានផែនការវិនិយោគ ១០០លានដុល្លារ នៅឆ្នាំ២០២៤-២០២៧ តាមរយៈការកសាងរោងចក្រកែច្នៃអេឡិចត្រូនិច និងសួនឧស្សាហកម្មបច្ចេកវិទ្យាខ្ពស់។

ឯកឧត្តមបណ្ឌិត អ៊ាង សុផល្លែត ក៏បានគូសបញ្ជាក់ថា ការវិនិយោគបៃតងនៅកម្ពុជា គឺបានអនុលោមទៅតាមវិធានប្រតិបត្តិសម្រាប់មាត្រា៦ នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុនៅកម្ពុជា ហើយក្រុមហ៊ុនចាំបាច់ត្រូវអនុវត្តទៅតាមមាត្រានៃកិច្ចព្រមព្រៀងនេះ ដើម្បីទទួលបានផលចំណេញ ដែលក្នុងនោះកម្ពុជា ក៏ទទួលបានបរិស្ថានល្អមានអព្យាក្រឹតកាបូន ឆ្ពោះទៅជំរុញកំណើនសេដ្ឋកិច្ច និងលើកកម្ពស់ជីវភាពរស់របស់ប្រជាជនផងដែរ៕