ភ្នំពេញ៖ ប្រទេសលុចសំបួ នឹងផ្តល់ជំនួយ ២លានអឺរ៉ូ ដើម្បីរួមចំណែកគាំទ្រគម្រោងបោសសម្អាតមីននៅកម្ពុជា ក្នុងគោលបំណងបង្កើនទិន្នផលនៃការបោសសម្អាតមីន ព្រមទាំងធ្វើឱ្យប្រសើរឡើងនូវការផ្តល់សេវាដល់ជនមានពិការភាព តាមរយៈមជ្ឈមណ្ឌលស្តារលទ្ធភាពពលកម្មកាយសម្បទា និងបង្កើតសមត្ថភាពជាតិក្នុងការឆ្លើយតបទៅនឹងការប្រមូលយុទ្ធភណ្ឌដែលនៅសេសសល់។

តាមសេចក្តីប្រកាសរបស់អាជ្ញាធរមីន ឯកឧត្តម បណ្ឌិត លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ អាជ្ញាធរមីន នឹងទៅចុះហត្ថលេខាលើកិច្ចព្រមព្រៀងថវិកាជំនួយដែលនឹងធ្វើឡើងនៅថ្ងៃទី១ ខែមេសា ឆ្នាំ២០២៥ សម្រាប់គម្រោងបោសសម្អាតមីនដើម្បីលទ្ធផល ដំណាក់កាលទី៤ និងទី៥ រវាងព្រះអង្គម្ចាស់ Guillaume Jean Joseph Marie រជ្ជទាយាទនៃប្រទេសលុចសំបួ និងលោកស្រី Alissar Chaker តំណាងកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជា (UNDP)៕