ភ្នំពេញ៖ លោកជំទាវបណ្ឌិត ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា លើកទឹកចិត្តឱ្យសាធារណជនទាំងអស់ បន្តចូលរួមបរិច្ចាគជាមួយមូលនិធិគន្ធបុប្ផាកម្ពុជា ដើម្បីស្នាមញញឹមដល់ទារក និងកុមារ ដែលជាអនាគតភ្លឺស្វាងរបស់កម្ពុជា ពិសេសដើម្បីរួមគ្នាបន្តរក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផា។

បើតាមសារលិខិតរបស់លោកជំទាវបណ្ឌិត ពេជ ចន្ទមុន្នី ក្នុងឱកាសពិធីបុណ្យចូលឆ្នាំថ្មី ឆ្នាំសកល ២០២៥ កាលពីថ្ងៃទី២៨ ខែធ្នូ ឆ្នាំ២០២៤ លោកជំទាវបណ្ឌិត បានបន្តថា ដំណើរការរបស់មន្ទីរពេទ្យគន្ធបុប្ផាក្នុងមួយឆ្នាំៗ គឺត្រូវការចំណាយថវិកាជាមធ្យមប្រមាណជាង ៤០លានដុល្លារ។

ប្រធានកិត្តិយសនៃមូលនិធិគន្ធបុប្ផាកម្ពុជា រូបនេះ បានបញ្ជាក់បន្ថែមថា មូលនិធិគន្ធបុប្ផាកម្ពុជា គឺជាមូលនិធិជាតិផ្លូវការតែមួយគត់របស់កម្ពុជា ដែលត្រូវបានផ្តួចផ្តើមបង្កើតឡើងកាលពីថ្ងៃទី១១ ខែមេសា ឆ្នាំ២០១៨ ដើម្បីកៀរគរថវិកាសប្បុរសធម៌ពីប្រភពស្របច្បាប់នានា ទាំងក្នុង និងក្រៅប្រទេស ក្នុងការរួមគ្នាក្នុងស្មារតី «ខ្មែរជួយខ្មែរ»។

លោកជំទាវបណ្ឌិត ពេជ ចន្ទមុន្នី បានមានប្រសាសន៍ថា ក្នុងស្មារតី «ខ្មែរជួយខ្មែរ» កន្លងមកនេះ គឺបានរួមចំណែកដ៏ធំធេង និងមិនអាចកាត់ថ្លៃបានក្នុងបេសកកម្មសង្គ្រោះជីវិតទារក កុមារ និងស្ត្រីមានផ្ទៃពោះរាប់លាននាក់នៅកម្ពុជា។ ប្រធានកិត្តិយសនៃមូលនិធិគន្ធបុប្ផាកម្ពុជា បានសង្ឃឹមថា ចលនានៃការបរិច្ចាគដោយទឹកចិត្តសប្បុរស និងប្រកបដោយក្ដីមេត្តានេះ នឹងនៅតែបន្តជាប់ជាប្រចាំ និងកាន់តែផុសផុលថែមទៀតផង៕