ភ្នំពេញ៖ ធនាគារជាតិនៃកម្ពុជា ស្នើឱ្យគ្រឹះស្ថានធនាគារនិងហិរញ្ញវត្ថុដកហូតក្រដាសប្រាក់ដុល្លារអាម៉េរិកក្លែងក្លាយពីអតិថិជនដោយគ្មានសំណង រួចបញ្ជូនទៅកាន់ភ្នាក់ងារសម្ងាត់អាម៉េរិកជាមួយនឹងរបាយការណ៍ដូចមានភ្ជាប់ក្នុងឧបសម្ព័ន្ធ ដើម្បីភ្នាក់ងារសម្ងាត់អាម៉េរិកស៊ើបអង្កេតបន្ត។ នេះបើតាមសេចក្តីជូនដំណឹងរបស់ធនាគារជាតិកម្ពុជា នាថ្ងៃទី០២ ខែមករា ឆ្នាំ២០២៥។

ដើម្បីរួមចំណែកទប់ស្កាត់ការចរាចរក្រដាសប្រាក់ដុល្លារអាម៉េរិកក្លែងក្លាយ និងតាមសំណើរបស់ភ្នាក់ងារសម្ងាត់អាម៉េរិក ធនាគារជាតិនៃកម្ពុជា ក៏បានស្នើឱ្យគ្រឹះស្ថានធនាគារនិងហិរញ្ញវត្ថុរក្សាទុកព័ត៌មានអំពីអត្តសញ្ញាណអតិថិជន ដែលចរាចរក្រដាសប្រាក់ដុល្លារអាម៉េរិកក្លែងក្លាយ រួចផ្តល់ព័ត៌មានទាំងនេះមកធនាគារជាតិនៃកម្ពុជា។

ធនាគារជាតិនៃកម្ពុជា ក៏បានអំពាវនាវឱ្យសាធារណជនប្រុងប្រយ័ត្នខ្ពស់ និងពិនិត្យពិច័យឱ្យបានហ្មត់ចត់មុននឹងទទួលយកក្រដាសប្រាក់ដុល្លារអាម៉េរិក ក្នុងករណីមានការសង្ស័យថាក្រដាសប្រាក់ដុល្លារអាម៉េរិកនោះក្លែងក្លាយ ត្រូវផ្ដល់ព័ត៌មានជូនធនាគារជាតិនៃកម្ពុជា។ ទន្ទឹមនឹងនេះ ធនាគារជាតិ បានលើកទឹកចិត្តឱ្យគ្រឹះស្ថានធនាគារនិងហិរញ្ញវត្ថុណែនាំអតិថិជន អំពីរបៀបកំណត់អត្តសញ្ញាណក្រដាសប្រាក់ដុល្លារអាម៉េរិកពិត ដើម្បីចូលរួមការទប់ស្កាត់ការប្រើប្រាសក្រដាសប្រាក់ដុល្លារអាម៉េរិកក្លែងក្លាយ៕